नागरिकांनो सावधान! हवामानात मोठा बदल, पुढील २४ तासांसाठी ‘या’ जिल्ह्यांना उष्णतेच्या लाटेचा इशारा…
पुणे : महाराष्ट्रात होळीपूर्वीच उन्हाचा कडाका वाढू लागला असून ठाणे जिल्हा आणि परिसरात तापमानाने चांगलीच उसळी घेतली आहे. हवामानातील अचानक बदल आणि उष्ण, कोरड्या व दमट वातावरणामुळे काही भागांसाठी हवामान विभागाने यलो अलर्ट जारी केला आहे.
या पार्श्वभूमीवर हवामान खात्याने पुढील २४ तास अत्यंत महत्त्वाचे असल्याचे सांगत इशारा दिला आहे. काही भागांत तापमान झपाट्याने वाढण्याची शक्यता व्यक्त करण्यात आली असून नागरिकांनी सतर्क राहण्याचे आवाहन करण्यात आले आहे.
सध्या राज्यातील अनेक भागांत उष्ण, कोरडे आणि दमट हवामानाचा अनुभव येत आहे. हवामान विभागाने काही ठिकाणांसाठी यलो अलर्ट जारी केला आहे. सोमवार, १६ फेब्रुवारी रोजी दिवसभर उष्णतेची तीव्रता अधिक जाणवेल, असा अंदाज वर्तवण्यात आला आहे. विशेषतः मुंबई महानगर प्रदेशात पुढील काही दिवस तापमान सरासरीपेक्षा जास्त राहण्याची शक्यता आहे. वाढलेल्या आर्द्रतेमुळे उकाडा अधिक जाणवू शकतो.
ठाणे जिल्ह्यात आज आकाश प्रामुख्याने निरभ्र राहण्याची शक्यता असून उन्हाचा चटका अधिक बसू शकतो. येथे किमान तापमान सुमारे २७ अंश सेल्सिअस तर कमाल तापमान ३८ अंश सेल्सिअसपर्यंत जाण्याचा अंदाज आहे. दुपारच्या सुमारास कडक उन्हामुळे उष्माघाताचा धोका वाढू शकतो.
कल्याण-डोंबिवली परिसरातही हवामान उष्ण आणि कोरडे राहील. या भागात कमाल तापमान जवळपास ३७ अंश सेल्सिअसपर्यंत तर किमान तापमान अंदाजे २४ अंश सेल्सिअस राहण्याची शक्यता आहे. दिवसभर ऊन आणि मध्यम आर्द्रता यामुळे नागरिकांना उष्णतेचा त्रास जाणवू शकतो.
शहरी भागांसोबतच ग्रामीण परिसरातही उष्ण आणि दमट वातावरण कायम राहण्याची चिन्हे आहेत. ग्रामीण भागात किमान तापमान साधारण २३ अंश सेल्सिअस तर कमाल तापमान ३८ अंश सेल्सिअसपर्यंत पोहोचू शकते. सकाळी व रात्री किंचित गारवा जाणवेल; मात्र दुपारच्या वेळेत उन्हाचा प्रभाव प्रकर्षाने जाणवेल. त्यामुळे दिवसाच्या मध्यभागी बाहेर पडताना काळजी घेणे गरजेचे आहे.
