गर्ल्स हॉस्टेल आणि लॉजसाठी नवे नियम लागू, सरकारचा मोठा निर्णय, नियम मोडल्यास होणार कारवाई…
पटणा : पटणा येथील गाजलेल्या गर्ल्स हॉस्टेल प्रकरणानंतर अखेर बिहार सरकारने कडक पावले उचलण्यास सुरुवात केली असून सातत्याने उपस्थित होत असलेले प्रश्न, माध्यमांमधील चर्चा आणि वाढता जनदबाव लक्षात घेता, राज्य सरकारने गर्ल्स हॉस्टेल आणि महिला लॉजच्या संचालनासाठी नवीन मानक कार्यपद्धती जारी केली आहे.
तसेच ही SOP प्रभावीपणे राबवण्यासाठी राज्यातील सर्व जिल्हाधिकारी आणि पोलीस अधीक्षकांना स्पष्ट व कडक निर्देश देण्यात आले आहेत. सरकारच्या या निर्णयाकडे महिला आणि विद्यार्थिनींच्या सुरक्षेच्या दृष्टीने महत्त्वाचे पाऊल म्हणून पाहिले जात आहे.
नव्या SOP अंतर्गत गर्ल्स हॉस्टेल आणि महिला लॉज चालवणाऱ्या संचालकांसाठी अनेक नियम अनिवार्य करण्यात आले आहेत. यामध्ये सीसीटीव्ही कॅमेरे बसवणे, ये-जा करणाऱ्या प्रत्येक व्यक्तीची नोंद रजिस्टरमध्ये ठेवणे, सुरक्षा रक्षकांची नियुक्ती, अग्निसुरक्षा उपकरणांची उपलब्धता आणि वेळोवेळी पोलीस व प्रशासनाकडून तपासणी या बाबींचा समावेश आहे.
सरकारने स्पष्ट केले आहे की नोंदणी (रजिस्ट्रेशन) न करता चालवले जाणारे हॉस्टेल किंवा लॉज यांच्यावर कठोर कारवाई केली जाईल. तसेच, हॉस्टेलमध्ये राहणाऱ्या सर्व विद्यार्थिनींची सविस्तर माहिती स्थानिक पोलीस ठाण्यात उपलब्ध करून देणे अनिवार्य असेल. कोणतीही संशयास्पद हालचाल आढळल्यास तात्काळ पोलिसांना माहिती देण्याची जबाबदारी हॉस्टेल व्यवस्थापनावर टाकण्यात आली आहे.
दरम्यान, याशिवाय, नियमांचे उल्लंघन करणाऱ्या संचालकांवर कठोर कायदेशीर कारवाई करण्यात येणार असल्याचे सरकारने स्पष्ट केले आहे. गरज भासल्यास अशा हॉस्टेल किंवा लॉजना सील करण्याचा अधिकारही प्रशासनाला देण्यात आला आहे.
