लोणीकाळभोर ला चौकात उभ्या मोटरसायकला जीप ठोकरल्याने एकाचा जागीच मृत्यू ! कवडीपाट ते कासुर्डी दरम्यानच्या महामार्गावर भिती कायम …!
उरुळी कांचन : पुणे – सोलापूर राष्ट्रीय महामार्गावर अज्ञात चारचाकी वाहनाने दुचाकीला दिलेल्या धडकेत दुचाकीवरील सहप्रवाशाचा मृत्यू झाल्याची घटना लोणी काळभोर (ता. हवेली) ग्रामपंचायत हद्दीत घडली आहे.
हनुमंत बळीराम जाधवर (वय ३८, रा. धाराशीव, ता. जि. धाराशिव) असे मृत्युमुखी पडलेल्या दुचाकीवरील सहप्रवाशाचे नाव आहे. या बाबत अप्पासाहेब नंदगावे (वय ३४, रा. मांजरी) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, दुचाकीस्वार अप्पासाहेब नंदगावे आणि हनुमंत जाधवर हे दोघेजण दुचाकीवरून हडपसरच्या दिशेने निघाले होते. लोणी काळभोर ग्रामपंचायत हद्दीत आले असता लोणी काळभोर गावाच्या दिशेने जाणाऱ्या चौकात दुचाकी थांबवली. त्याचवेळी पाठीमागून भरधाव आलेल्या चारचाकी गाडीने दुचाकीला जोरदार धडक दिली.
दरम्यान, या अपघातात दुचाकीच्या पाठीमागे बसलेले जाधवर हे गंभीर जखमी झाले. त्यांना उपचारासाठी लोणी काळभोर येथील एका खाजगी रुग्णालयात दाकःल करण्यात आले. मात्र उपचारादरम्यान जाधवर यांचा मृत्यू झाला. अपघातानंतर पसार झालेल्या मोटारचालकाच्या विरुद्ध लोणी काळभोर पोलीस ठाण्यात गुन्हा दाखल करण्यात आला आहे. पुढील तपास लोणी काळभोर पोलिस करीत आहेत.
