पुणेकरांनो पाणी जपून वापरा! उद्या अनेक भागातील पाणीपुरवठा पूर्णपणे बंद, जाणून घ्या..
पुणे : पुणे शहरातील नागरिकांसाठी अत्यंत महत्त्वाची माहिती आली आहे. बुधवारी (ता. २१ जानेवारी) शहरातील काही भागांमध्ये संपूर्ण दिवस पाणीपुरवठा बंद राहणार असून, पुढील दिवशी म्हणजे गुरुवारी (ता.२२ जानेवारी) पाणी उशिरा आणि कमी दाबाने मिळण्याची शक्यता आहे.
पाणीपुरवठ्याशी संबंधित तांत्रिक व विकासात्मक कामासाठी रावेत उपसा केंद्र येथील मुख्य जलवाहिनीवर काम हाती घेण्यात आले आहे. त्यामुळे पाणीपुरवठा बंद राहणार आहे. त्यामुळे नागरिकांनी आधीच पाण्याचा साठा करून ठेवावा, असे आवाहन प्रशासनाकडून करण्यात आले आहे.
महानगरपालिकेच्या पाणीपुरवठा विभागाने दिलेल्या माहितीनुसार, जलवाहिनी बाजूला हटविण्याचे तांत्रिक काम रावेत उपसा केंद्र परिसरात करण्यात येणार आहे. हे काम पूर्ण करण्यासाठी जलवाहिनीवरील पाणीपुरवठा पूर्णतः बंद ठेवावा लागणार असल्याने शहरातील काही भागांवर त्याचा थेट परिणाम होणार आहे. या कामामुळे भविष्यातील पाणीपुरवठा अधिक सुरक्षित आणि सुरळीत राहावा, हा प्रशासनाचा उद्देश आहे.
दरम्यान, या नियोजित कामामुळे कळस, माळवाडी, जाधव वस्ती, गणेशनगर (बोपखेल), विश्रांतवाडीचा काही भाग, म्हस्के वस्ती, संजय पार्क, बर्माशेल परिसर, विमानतळ आणि आसपासच्या भागांतील नागरिकांना पाणीटंचाईचा सामना करावा लागणार आहे. घरगुती नागरिकांसह व्यावसायिक आस्थापनांनाही याचा फटका बसणार असून दैनंदिन कामकाजावर परिणाम होण्याची शक्यता आहे.
बुधवारी संपूर्ण दिवस पाणीपुरवठा बंद राहणार असल्याने अनेक भागांत पाण्याची तीव्र गरज भासू शकते. तसेच गुरुवारी सकाळी उशिरा आणि कमी दाबाने पाणी मिळाल्याने सकाळच्या वेळेत पाण्याचा ताण जाणवण्याची शक्यता आहे. त्यामुळे नागरिकांनी उपलब्ध पाण्याचा काटकसरीने वापर करावा, असे आवाहन करण्यात आले आहे.
दरम्यान, महानगरपालिकेने या नियोजित कामाबाबत नागरिकांकडून सहकार्याची अपेक्षा व्यक्त केली आहे. पाणीपुरवठा शक्य तितक्या लवकर पूर्ववत करण्यासाठी कर्मचारी युद्धपातळीवर काम करणार असल्याचेही प्रशासनाने स्पष्ट केले आहे. कोणत्याही प्रकारची अडचण उद्भवल्यास नागरिकांनी संबंधित पाणीपुरवठा विभागाशी संपर्क साधावा, असे आवाहन करण्यात आले आहे.
अनावश्यक पाण्याचा वापर टाळण्याचे आवाहन…
दोन दिवस पाणीपुरवठ्यातील व्यत्ययामुळे नागरिकांना गैरसोयीचा सामना करावा लागू शकतो. त्यामुळे घरगुती वापरासाठी आवश्यक पाण्याचा साठा करून ठेवण्यासोबतच अनावश्यक पाण्याचा वापर टाळण्याचे आवाहन प्रशासनाकडून करण्यात आले आहे.
