मोठी बातमी! कुख्यात गुंड आंदेकरच्या कुटुंबाला अजित पवारांच्या पक्षाकडून तिकीट,पुण्यात वातावरण तापणार?
पुणे: पुणे महानगरपालिका निवडणुकीसाठी आता गुन्हेगारी टोळी रिंगणात उतरल्याने राजकीय वर्तुळात खळबळ उडाली आहे. कुख्यात गुंड बंडू आंदेकर आज राष्ट्रवादी काँग्रेस (अजित पवार) पक्षाकडून आपला उमेदवारी अर्ज दाखल करणार आहे. त्याच्यासोबत आंदेकर कुटुंबातील इतर दोन सदस्यही अर्ज भरणार आहेत. त्यामुळे पुण्यातील राजकीय वातावरण ढवळून निघणार आहे.
समोर आलेल्या माहितीनुसार, पुणे महानगरपालिकेच्या निवडणुकीसाठी अजित पवार गटाने या तिन्ही उमेदवारांना हिरवा कंदील दिला आहे.यामध्ये कुख्यात गुंड बंडू आंदेकर, लक्ष्मी उदयकांत आंदेकर आणि वनराज आंदेकर यांच्या पत्नी सोनाली आंदेकर तिघांचा समावेश आहे.गुन्हेगारी पार्श्वभूमी असलेल्या व्यक्तीला सत्तेतील पक्षाने उमेदवारी दिल्याने आता पुण्यात नव्या राजकीय वादाला तोंड फुटण्याची शक्यता आहे.
आज भवानी पेठ क्षेत्रीय कार्यालयात त्यांचे अर्ज दाखल केले जातील. मात्र, आंदेकर टोळीच्या गुन्हेगारी पार्श्वभूमीमुळे पक्षाकडून या उमेदवारीबाबत कमालीची गुप्तता पाळली जात आहे. कुठेही याची वाच्यता न करता थेट अर्ज भरण्याची प्रक्रिया पूर्ण केली जात आहे. विशेष म्हणजे, सध्या अटकेत असलेल्या आंदेकरला न्यायालयाने काही अटी आणि शर्तींसह अर्ज भरण्याची परवानगी दिली आहे.
या निवडणुकीसाठी बंडू आंदेकर याने काही दिवसांपूर्वी न्यायालयाकडे अर्ज केला होता. अजित पवार गटाकडून निवडणूक लढवायची आहे, त्यासाठी अर्ज भरण्याची मुभा मिळावी, अशी मागणी कोर्टाकडे केली होती. यावर सुनावणी करताना न्यायालयाने अत्यंत महत्त्वाचे निरीक्षण नोंदवले. “निवडणूक लढवणे हा नागरिकांचा मूलभूत अधिकार आहे आणि त्यापासून कोणालाही रोखता येणार नाही,” असे स्पष्ट करत न्यायालयाने आंदेकरला निवडणूक लढण्यास परवानगी दिली होती.
न्यायालयाने दिलेल्या परवानगीनुसार, बंडू आंदेकरला कोणत्याही प्रकारचं शक्तीप्रदर्शन करता येणार नाही. अर्ज भरताना घोषणाबाजी करता येणार नाही. शिवाय गर्दी गोळा करण्यास मनाई करण्यात आली आहे. बंडू आंदेकरला कडक पोलीस बंदोबस्तात भवानी पेठ क्षेत्रीय कार्यालयात आणलं जाईल. अर्ज भरल्यानंतर त्याला पुन्हा कोठडीत नेलं जाणार आहे.
