मोठी बातमी! भाजपच्या बड्या नेत्याच्या भावाला अटक, मारहाण प्रकरण भोवलं, बीड जिल्ह्यात खळबळ…
बीड : बीड जिल्ह्यातील गेवराई विधानसभा मतदारसंघात राजकीय संघर्षाची धार दिवसेंदिवस तीव्र होताना दिसत आहे. नगरपरिषद निवडणूक प्रक्रियेदरम्यान झालेल्या राड्याच्या पार्श्वभूमीवर, भारतीय जनता पक्षाचे माजी आमदार लक्ष्मण पवार यांचे बंधू बाळराजे पवार यांना गेवराई पोलिसांनी मध्यरात्री अटक केली आहे.
या कारवाईमुळे जिल्ह्यात मोठी खळबळ उडाली आहे. या अटकेनंतर कोणताही अनुचित प्रकार घडू नये, यासाठी शहरात आणि पोलीस ठाणे परिसरात मोठ्या प्रमाणावर पोलीस बंदोबस्त तैनात करण्यात आला आहे.नगरपरिषद निवडणुकीदरम्यान घडलेल्या राड्याच्या पार्श्वभूमीवर ही कारवाई करण्यात आली आहे.
गेवराई शहरात राजकीय वर्चस्वासाठी दोन गटांमध्ये असलेला तणाव दिवसेंदिवस तीव्र होत असून, या अटकेमुळे परिस्थिती आणखी चिघळण्याची शक्यता वर्तवली जात आहे. पोलिसांकडून संपूर्ण प्रकरणावर बारकाईने लक्ष ठेवण्यात येत आहे.
तसेच २ डिसेंबर रोजी गेवराई नगरपरिषदेच्या मतदान प्रक्रियेदरम्यान माजी आमदार लक्ष्मण पवार आणि माजी आमदार अमरसिंह पंडित यांच्या समर्थकांमध्ये जोरदार वाद झाला होता. मतदान केंद्राबाहेर सुरू झालेली बाचाबाची काही वेळातच हाणामारीत रूपांतरित झाली. या गोंधळात अनेक कार्यकर्ते जखमी झाल्याचे समोर आले होते.
या घटनेत बाळराजे पवार यांनी अमरसिंह पंडित यांचे स्वीय सहाय्यक अमृत डावकर यांना मारहाण केल्याचा आरोप आहे. मात्र, अटकेपूर्वी बाळराजे पवार हे स्वतःहून रात्री गेवराई पोलीस ठाण्यात हजर झाल्याची माहिती पोलिसांकडून देण्यात आली आहे. तरीही तपासात गंभीर बाबी समोर आल्याने पोलिसांनी अटक करण्याचा निर्णय घेतला.
दरम्यान, या प्रकरणाची गंभीर दखल घेत गेवराई पोलिसांनी सुरुवातीला सुमोटो कारवाई करत सुमारे 50 जणांविरोधात गुन्हे दाखल केले होते. अनेक संशयितांना नोटीस बजावून चौकशीही करण्यात आली होती. मात्र तपास पुढे जात असताना बाळराजे पवार यांच्यावरील आरोपांची व्याप्ती वाढल्याचे पोलिस तपासात स्पष्ट झाले.
