मनसे प्रमुख राज ठाकरेंना कोर्टाकडून 1 महिन्याची डेडलाईन; काय आहे 2008 चं प्रकरण?
मुंबई : महाराष्ट्र नवनिर्माण सेनेचे अध्यक्ष राज ठाकरे यांच्या २००८ मधील एका जुन्या प्रकरणासाठी ठाणे कोर्टात महत्त्वपूर्ण सुनावणी पार पडली. यावेळी ठाणे न्यायालयात ते हजर झाले असता त्यांनी न्यायाधीशांसमोर ‘मी दोषी नाही’ असे स्पष्ट केले. कोर्टाने हे प्रकरण एक महिन्यात संपवण्याचे संकेत देत राज ठाकरे यांना सहकार्य करण्याचे निर्देश दिले.
आज राज ठाकरें ठाण्यातील मुख्य न्यायदंडाधिकारी न्यायमूर्ती अभिजीत कुलकर्णी यांच्या कोर्टात हजर झाले. यावेळी, राज ठाकरे यांनी न्यायाधीशांसमोर मला गुन्हा कबूल नाही असे स्पष्ट केले. यावर न्यायालयाने प्रकरणावर लवकर तोडगा काढायचा असल्याचे सांगत राज ठाकरे यांना महत्त्वाचे निर्देश दिले.तुम्ही सहकार्य करा, एक महिन्यात हे प्रकरण संपेल. तुम्हाला यायची गरजही लागणार नाही, असे कोर्टाने यावेळी म्हटले.
काय आहे प्रकरण?
मनसे अध्यक्ष राज ठाकरे यांच्यावर दाखल असलेला हा खटला सुमारे १७ वर्षांपूर्वीचा आहे. २००८ मध्ये उत्तर भारतीयांसाठी रेल्वे भरती मंडळाची परीक्षा मुंबई आणि महाराष्ट्रातील अन्य केंद्रांवर आयोजित करण्यात आली होती. त्यावेळी मराठी तरुणांच्या नोकरीच्या हक्कासाठी मनसेच्या कार्यकर्त्यांनी आक्रमक भूमिका घेत आंदोलन केले होते. याच आंदोलनादरम्यान कल्याण रेल्वे पोलीस स्टेशनच्या हद्दीत मारहाण आणि प्रक्षोभक भाषण केल्याप्रकरणी राज ठाकरे यांच्यासह अनेक मनसे नेत्यांवर गुन्हे दाखल करण्यात आले होते.
सुरुवातीला हा खटला कल्याण कोर्टात दाखल करण्यात आला होता. आता हा खटला आता ठाणे कोर्टात वर्ग करण्यात आला आहे. यावेळी न्यायमूर्ती अभिजीत कुलकर्णी यांच्या दालनात ही सुनावणी सुरू झाली. राज ठाकरे यांच्यासह या प्रकरणात सहभागी असलेले त्यांचे सात सह-आरोपी देखील कोर्टात उपस्थित होते. मनसेच्या वरिष्ठ फळीतील नेते नितीन सरदेसाई, अभिजीत पानसे आणि अविनाश जाधव हे देखील कोर्टात हजर होते.
न्यायालयाने एका महिन्याची डेडलाइन देत हे प्रकरण संपवण्याची तयारी दाखवल्यामुळे महाराष्ट्र नवनिर्माण सेना आणि राज ठाकरे यांच्यासाठी ही सुनावणी महत्त्वपूर्ण ठरली आहे. कोर्टाच्या या निर्देशानंतर या प्रकरणातील पुढील घडामोडींकडे सर्वांचे लक्ष लागले आहे.
