पंढरपूरमध्ये आक्रीत घडलं! लहान मुलगा शेततळ्यात पडला, वाचवायला आई वडील गेले अन् त्यांचाही बुडून मृत्यू…

पंढरपूर : येथील शेतात सालगडी म्हणून काम करणाऱ्या पती, पत्नी व त्यांच्या पाच वर्षे मुलाचा शेततळ्यात बुडून मृत्यू झाला. यामुळे हळहळ आहे. विजय राजकुमार लोंढे (वय 30) प्रियांका विजय लोंढे (वय 28) प्रज्वल विजय लोंढे (वय 5) या तिघांचा मृत्यू झाला आहे. शेततळ्यात असलेले शेवाळे व विजय लोंढे यांना मायलेकरांनी मिठी मारल्यामुळे या तिघांचाही पाण्यात बुडून मृत्यू झाला.

त्यांचा मोठा मुलगा शाळेत गेल्यामुळे तो बचावला आहे. पंढरपूर तालुक्यातील कोर्टी येथे सुरेश लाड व निखिल लाड यांचे शेत असून, या शेतामध्ये कामे करण्यासाठी लोंढे पती-पत्नी राहत होते. त्यांना दोन मुले असून, एक मुलगा शाळेत गेल्यामुळे घटनेच्या वेळी तो तेथे उपस्थित नव्हता. शेतातील काम करत असताना त्यांचा लहान मुलगा प्रज्वल हा खेळत खेळत शेततळ्यामधील पाण्यात पडला.

यावेळी त्याला वाचवण्यासाठी आईने पाण्यात उडी मारली. मात्र त्यांना शेततळ्यातून बाहेर येता येत नसल्यामुळे विजय लोंढे यांनी दोघांना वाचवण्यासाठी पाण्यात उडी मारली. मात्र दोघांनी त्यांना पकडल्याने त्यांना देखील बाहेर येणे शक्य झाले नाही. लोंढे कुटुंबीय मूळचे मंगळवेढा तालुक्यातील रहिवासी असून जगण्यासाठी पंढरपूर तालुक्यातील एका शेतात सालगडी म्हणून राहत होते.

दरम्यान, या घटने नंतर पोलिसांनी घटनास्थळी जाऊन तिघांचे मृतदेह शेततळ्यातून बाहेर काढले. यामुळे पती-पत्नी आणि त्यांचा चिमुरडा या संपूर्ण कुटुंबावर काळाने घाला घातला आहे. यामुळे गावावर शोककळा पसरली आहे. ही घटना दुपारी सव्वातीनच्या दरम्यान घडली. मात्र या परिसरात इतर कोणी नसल्यामुळे याबाबत कोणालाच घटनेची माहिती समजली नाही.

दरम्यान, कोर्टी येथे सुरेश लाड व निखिल लाड यांचे शेत असून, या शेतामध्ये विविध कामे करण्यासाठी लोंढे पती-पत्नी राहत होते. त्यांना दोन मुले असून, एक मुलगा शाळेत गेल्यामुळे घटनेच्या वेळी तो तेथे उपस्थित नव्हता. घटनेने सध्या परिसरात दुःखाचा डोंगर उभा राहिला आहे.