धक्कादायक! पंढरपूरच्या विठ्ठल मंदिरातील कर्मचाऱ्यांना दिवाळीनिमित्त चक्क चिकन मसाल्याची भेट, वारकऱ्यांचा संताप
पंढरपूर : दिवाळी हा हिंदू संस्कृतीतील अत्यंत महत्त्वपूर्ण सण आहे. या सणाच पावित्र्य राखल जातं. अशातच आता पंढरपुरातील श्री विठ्ठल-रुक्मिणी मंदिरात कर्मचाऱ्यांना दिलेल्या दिवाळी भेटीवरून संतापाचं वातावरण निर्माण झालं आहे. मंदिरातील कर्मचाऱ्यांना बीव्हीजी कंपनीकडून ‘चिकन मसाला’ भेटवस्तू म्हणून देण्यात आल्याचे समोर आले असून, या घटनेमुळे वारकरी संप्रदाय आणि विठ्ठल भक्तांमध्ये तीव्र नाराजी व्यक्त केली आहे.
श्री क्षेत्र पंढरपूर हे वारकरी संप्रदायाचे केंद्रस्थान मानले जाते. येथे दरवर्षी लाखो वारकरी ‘माऊली माऊली’चा गजर करत पायी वारी करतात. वारकरी परंपरेनुसार शाकाहार, संयम आणि साधेपणा ही जीवनशैली मानली जाते. मांसाहार, मद्यपान किंवा त्यासंबंधित कोणत्याही वस्तूंना येथे थारा नसतो. अशा ठिकाणी ‘चिकन मसाल्या’सारख्या वस्तूंची भेटवस्तू म्हणून वाटप झाल्याने वारकरी संप्रदायाने नाराजी व्यक्त केली आहे.
पंढरपूरच्या श्री विठ्ठल रुक्मिणी मंदिरात बीव्हीजी कंपनी सुरक्षा रक्षक पुरवते. कर्मचाऱ्यांना मिळालेल्या भेटवस्तूंमध्ये कंपनीचे इतर उत्पादनेही देण्यात आली आहेत. मात्र कर्मचाऱ्यांना चिकन मसाल्याची भेट दिल्याने वारकऱ्यांनी संताप व्यक्त केला आहे.
मिळालेल्या माहितीनुसार, मंदिरात सुरक्षारक्षक, स्वच्छता कर्मचारी आणि इतर काही सेवा बीव्हीजी कंपनी आऊटसोर्सिंग पद्धतीने पुरवते. दिवाळीच्या निमित्ताने या कर्मचाऱ्यांना कंपनीकडून भेटवस्तू देण्यात आल्या. परंतु भेट पिशवीत चिकन मसाल्याचे पाकीट असल्याचे दिसून आले. त्यामुळे मोठ्या प्रमाणावर सध्या वारकरी संप्रदायातून चिकन मसाल्याच्या भेटवस्तूबाबत संताप व्यक्त केला जात आहे.
