पुण्यानंतर मावळात महायुतीत वादाची ठिणगी ; राष्ट्रवादीचा आमदार थेट भाजपला भिडला…
पुणे : पुणे जिल्हा परिषद निवडणुकांसाठी आरक्षण सोडत जाहीर झाली आहे. ही आरक्षण सोडत जाहीर झाल्यानंतर आतापासूनच सर्वच राजकीय पक्षांनी कंबर कसली असून जिल्हा परिषदेवर आपलाच झेंडा फडकवायचा हा चंगच बांधला आहे. मात्र यामुळे महायुतीत मोठा वाद निर्माण झाला आहे.मावळचे अजित पवारांच्या राष्ट्रवादीचे आमदार सुनील शेळके यांनी थेट भाजपला आव्हान देत येत्या जिल्हा परिषद निवडणुकीत आपली एकही जागा महायुतीला देणार नाही आणि त्यातली त्यात भाजपला तर नाहीच नाहीचं नाही असं म्हणत महायुतीतील नव्या वादाला सुरुवात केली आहे.
आगामी स्थानिक स्वराज्य संस्थांच्या निवडणुकीच्या पार्श्वभूमीवर वडगाव मावळ येथे राष्ट्रवादी काँग्रेस पक्षाची बैठक पार पडली. या बैठकीत सुनील शेळके यांनी भाजपला एकही जागा देणार नसल्याचा स्पष्ट केलं.’युती झाली तर ठीक आहे, पण नाही झाली तरी राष्ट्रवादी काँग्रेस पक्ष स्वबळावर लढण्यासाठी पूर्णपणे सज्ज आहे. आमचा पक्ष कार्यकर्त्यांच्या बळावर उभा आहे. जनतेने आमच्यावर दाखवलेला विश्वास हेच आमचे खरं बळ आहे. येणाऱ्या जिल्हा परिषद पंचायत समिती निवडणुकीमध्ये आपण महायुती म्हणून जरी असलो तरी येणाऱ्या जिल्हा परिषद निवडणुकांमध्ये आपली एकही जागा महायुतीला देणार नाही भारतीय जनता पक्षाला तर नाहीच नाही, असं त्यांनी स्पष्ट केला आहे. त्यामुळे निवडणुकीच्या तोंडावर महायुतीत मोठी ठिणगी पडली आहे.
दरम्यान गेल्या विधानसभा निवडणुकीत सुनील शेळके यांच्या विरोधात भारतीय जनता पक्षाने शड्डू ठोकला होता. महायुती असल्यामुळे उमेदवार देता आला नसला तरी स्थानिक भाजपच्या नेत्यांनी अपक्ष बापू भेगडे यांच्या पाठीमागे उभे राहणेच पसंत केले होते. मात्र तरी देखील सुनील शेळके हे लाखांच्या फरकाने निवडून आले. आता शेळके विरुद्ध भाजप या मावळ मधल्या जुन्या वादाचा नवा अंक स्थानिक स्वराज्य संस्था निवडणुकीत पाहायला मिळणार आहे.
