पर्वती मतदारसंघातील नागरिकांच्या संघर्षाला यश ; एकनाथ शिंदेंचा एसआरए प्रकल्पालाबाबत ‘ऑन द स्पॉट’ निर्णय

पुणे : राज्याचे उपमुख्यमंत्री एकनाथ शिंदे हे काल पुणे दौऱ्यावर होते. यावेळी पर्वती मतदारसंघातील सर्व्हे क्र. 92, शाहू वसाहत परिसरात असताना वसाहतीतील शेकडो नागरिकांनी शिंदे यांची भेट घेऊन आपली व्यथा मांडली होती. शासनाच्या नावाखाली लादण्यात आलेल्या एसआरए प्रकल्पालासाठी त्यांचा संघर्ष चालू होता. अखेर नागरिकांच्या दीर्घकाळ चाललेल्या संघर्षाला यश मिळालं. उपमुख्यमंत्री एकनाथ शिंदे यांनी स्वतः हस्तक्षेप करून या प्रकल्पाला स्थगिती देण्याचा तातडीचा निर्णय घेतला आहे.

उपमुख्यमंत्री एकनाथ शिंदे यांनी वसाहतीतील नागरिकांचे म्हणणे ऐकून घेतल्यानंतर तत्काळ एसआरएचे मुख्य कार्यकारी अधिकारी सतीशकुमार खडके यांना दूरध्वनीवर संपर्क साधला आणि स्पष्ट शब्दांत आदेश दिले. त्यानंतर एसआरए प्रकल्पाला अखेर स्थगिती देण्यात आली आहे. त्यामुे नागरिकांच्या दीर्घकाळ चाललेल्या संघर्षाला यश मिळालं आहे.दरम्यान या एसआरए प्रकल्पामुळे सर्वसामान्य रहिवाशांचे हक्क, घरे आणि सुरक्षित भविष्य धोक्यात येत असल्याची भीती या नागरिकांकडून व्यक्त केली जात होती.

नागरिकांच्या मते, या प्रकल्पासाठी त्यांची संमती घेतली गेली नव्हती. कोणतीही पारदर्शक प्रक्रिया न ठेवता काही मोजक्या व्यक्तींना लाभ मिळावा, अशा प्रकारे हा प्रकल्प पुढे नेला जात होता. आम्हाला विकास हवा आहे, पण तो लोकशाही मार्गाने, पारदर्शकतेने आणि आमच्या संमतीने व्हावा, असं येथील नागरिकांचे म्हणणं होतं. अखेर उपमुख्यमंत्री एकनाथ शिंदे यांनी एसआरए प्रकल्पाचा स्थगिती देण्याचे आदेश दिले. या निर्णयाने हजारो कुटुंबांना दिलासा मिळाला आहे.