पर्यटकांच्या जीवाशी खेळ ; पुण्यातील सिंहगड घाटात ट्रक दरीत कोसळला अन….
पुणे : गेल्या वर्षभरापासून सिंहगडाच्या घाट रस्त्यावरील जड वाहनांच्या बेकायदा वाहतुकीचा मुद्दा समोर आला आहे. पर्यटकांसाठी राखीव असलेल्या या घाटातून कोंढणपूरमार्गे येणारी अवजड वाहने जात असल्यामुळे अपघातांचं प्रमाण वाढलं आहे.अशातच आता सिंहगड घाटातून जाणाऱ्या एका मोठ्या ट्रकचा भीषण अपघात होऊन तो खोल दरीत कोसळला असल्याची धक्कादायक माहिती समोर आली आहे. यावेळी वाहनचालकाने उडी मारल्याने त्याचे प्राण वाचले. मात्र या घटनेमुळे सिंहगड घाटातील जड वाहनांच्या बेकायदा वाहतुकीचा मुद्दा पुन्हा ऐरणीवर आला आहे.
समोर आलेल्या माहितीनुसार, सिंहगड घाटात गोळेवाडी प्रवेशशुल्क फाट्यापासून चार किलोमीटर अंतरावरील ‘एक हजार पॉइंट’ या धोकादायक वळणावर ट्रक घाटातून जाताताना अरुंद वळणावर वाहनचालकाचा ताबा सुटला. यावेळी ट्रक तब्बल 100 फूट खाली दरीत कोसळला. या अपघातात वाहनचालक जखमी झाला आहे.या अपघाताबाबत माहिती मिळताच रविवारी वन विभागाचे अधिकारी आणि कर्मचाऱ्यांनी या ट्रकची पाहणी केली. ट्रक खोल दरीत पडला असल्यामुळे क्रेनच्या मदतीने काढण्यात आला.
दरम्यान हा सिंहगड घाट रस्ता अरुंद असल्याने या मार्गावर जड वाहनांना बंदी घालण्यात आली आहे. घाटातील धोकादायक वळणांमुळे मोठे ट्रक, मोठ्या बस आणि मिनीबस टेम्पो ट्रॅव्हलर गाड्यांच्या वाहतुकीला बंदी घालण्यात आली आहे.
