पुण्यातील वारकरी भक्तांना अज्ञात तरुणांकडून पंढरपुरात बेदम मारहाण, हल्लेखोरांचा शोध सुरू…
पुणे: महाराष्ट्राचे आराध्य दैवत पंढरपूरक्षेत्रीचा राजा म्हणजेच ‘पांडुरंग’ याच दर्शन घेण्यासाठी वारकरी देशभरातून येत असतात. गोरगरीबांचा देव म्हणून विठ्ठलाची ओळख आहे. याच विठ्ठल मंदिरा बाहेर आता पहाटे पावणेपाच वाजण्याच्या सुमारास काही अज्ञात तरुणांनी पुण्यातील वारकरी भक्तांना मारहाण केली असल्याची धक्कादायक घटना समोर आली आहे. या हल्ल्यात तरुणांनी वारकऱ्यांवर दगडे भिरकावली, ज्यामुळे अनेक वारकऱ्यांचे डोके फुटले आणि ते जखमी झाले. जखमी झालेल्या विठ्ठल भक्तांवर सध्या खासगी रुग्णालयात उपचार सुरू आहेत. सीसीटीव्ही फुटेज मध्ये ही घटना कैद झाली असून हल्लेखोरांचा पोलिसांकडून तपास सुरू आहे.
समोर आलेल्या माहितीनुसार,पुणे शहरातून आलेल्या विठ्ठल भक्तांना लक्ष्य करण्यात आल्याचे समोर आले आहे. अज्ञात तरुणांनी केलेल्या या हल्ल्याची संपूर्ण घटना परिसरातील सीसीटीव्ही कॅमेऱ्यात कैद झाली असून, पोलीस फुटेजच्या आधारे हल्लेखोरांचा शोध घेत आहेत. विठ्ठल मंदिराच्या पवित्र परिसरात वारकऱ्यांवर झालेल्या या हल्ल्यामुळे तीव्र संताप व्यक्त होत आहे.
दरम्यान अशा घटना पंढरपुरात घडत असतील तर भाविकांनी पंढरपुरात यायचं का नाही ? असा सवाल मारहाण झालेल्या भाविकांच्या साथीदारांपैकी दत्तात्रय भंडारी यांनी उपस्थित केला आहे. दत्तात्रय भंडारी पुणे येथील ज्येष्ठ नागरिक संघाचे पदाधिकारी आहेत. त्यांच्या ग्रुपमधील काही भाविकांना पंढरपुरात मारहाण झाली असल्याचं त्यांनी म्हटलं आहे. या घटनेमुळे परिसरात संताप व्यक्त केला जात आहे.
