मराठ्यांच्या लढ्याला यश ; हैदराबाद गॅझेटच्या जीआरनंतर आता सातारा गॅझेटसाठीच्या हालचालींना वेग….
पुणे : मराठा आंदोलक मनोज जरांगे पाटील यांनी मराठा समाजाला आरक्षण मिळावे यासाठी ऐन गणेशोत्सवात आमरण उपोषण केले होते. सरकारने त्यांच्या मागण्या मान्य केल्या आणि हैदराबाद गॅझेटचा जीआर काढला. त्यानंतर त्यांनी उपोषण मागे घेतले. यावेळी सरकारने मनोज जरांगे यांना सातारा गॅझेटचा जीआर काढण्यासाठी एक महिन्याचा कालावधी दिला होता. आता याबाबत महत्वाची माहिती समोर आली आहे. हैदराबाद गॅझेटनंतर आता सातार गॅझेटचा जीआर काढण्यासाठी सरकारकडून हालचालींना वेग आला आहे.
मनोज जरांगे पाटील यांना सरकारने सातारा गॅझेटसाठी एक महिन्याचा कालावधी दिल्यानंतर आता त्याच्या अंमलबजावणीसाठी राज्य सरकारने हालचाली सुरू केल्या आहेत. सातारा गॅझेटमध्ये पश्चिम महाराष्ट्रातील कुणबी नोंदी असलेल्या कुटुंबांची नावे सविस्तर नमूद आहेत. ज्यांचे मूळ या भागात आहेत. त्यांना कुणबी प्रमाणपत्र मिळवण्यासाठी हे उपयोगी ठरेल, अशी माहिती मराठा आरक्षण मंत्रिमडळ उपसमितीमधील एका मंत्र्याने दिली आहे. सातारा गॅझेटबाबत सरकारकडून हालचालींना वेग आला आहे. सरकारने मोडी लिपीतील या दस्तावेजाचे अचूक आणि अधिकृत भाषांतर करण्यास देखील सुरूवात केली आहे. उर्दू आणि पारशी भाषांतील मजकुराचाही योग्य अर्थ लावण्याचे काम सुरू आहे.
सातारा गॅझेट जीआरनुसार कुणबी प्रमाणपत्र वितरणासाठी गाव समिती स्थापन केली आहे. समितींचे प्रशिक्षण घेतले जाणार आहे. याची जबाबदारी जिल्हाधिकाऱ्यांवर सोपवण्यात आली आहे. बीड जिल्ह्याने आधिच प्रशिक्षण प्रक्रिया सुरू केली आहे. तिथे सर्वाधिक कुणबी प्रमाणपत्रे दिली आहेत.त्यानुसार सातारा गॅझेटवर आधारित अहवाल तयार करण्याचे आदेश देण्यात आले आहेत. सातारा गॅझेटचा अभ्यास करून अहवाल सादर करा. मराठा आरक्षण मंत्रिमंडळ उपसमितीने पुणे विभागीय आयुक्त चंद्रकांत पुलकुंडवार यांना मंगळवारी याबाबतचे आदेश दिले. उपसमितीचे अध्यक्ष राधाकृष्ण विखे पाटील यांनी विभागीय आयुक्तांना हे आदेश दिलेत.
