झोमॅटो वापरकर्त्यांसाठी महत्वाची माहिती! आता प्रत्येक ऑर्डरवर द्यावा लागणार ‘हा’ चार्ज…
नवी दिल्ली : झोमॅटो वापरकर्त्यांसाठी एक महत्वाची माहिती समोर आली आहे. ऑनलाइन फूड ऑर्डर करणाऱ्यांसाठी आता प्रत्येक ऑर्डरसाठी अधिक पैसे मोजावे लागणार आहेत. कारण कंपनीने आपल्या प्लॅटफॉर्म फीमध्ये तब्बल २० टक्क्यांनी वाढ केली आहे.
तसेच आधी १० रुपये घेतली जाणारी ही फी आता १२ रुपये आकारली जाणार आहे. या दोन रुपयांच्या वाढीमुळे ग्राहकांच्या खिशावर अतिरिक्त ताण पडणार आहे. ही नवी फी झोमॅटो सेवा देत असलेल्या सर्व शहरांत लागू करण्यात आली आहे.
गेल्या काही काळापासून झोमॅटो सातत्याने आपली प्लॅटफॉर्म फी वाढवत असल्याचं दिसून येत आहे. गेल्या वर्षीही फेस्टिव सीझनच्या आधी कंपनीने आपली फी ६ रुपयांवरून १० रुपये केली होती. त्याआधी तीन महिन्यांतच ५ रुपयांवरून ६ रुपये करण्यात आले होते.
म्हणजेच कंपनी दर काही महिन्यांनी शुल्क वाढवत आहे. यामुळे केवळ ग्राहकच नव्हे तर रेस्टॉरंट मालकांनाही या वाढीचा फटका बसणार आहे. झोमॅटोचा थेट स्पर्धक असलेला स्विगीनेही काही शहरांमध्ये प्लॅटफॉर्म फी १४ रुपये आकारायला सुरुवात केली आहे.
सणासुदीच्या काळात मागणी मोठ्या प्रमाणात वाढते आणि त्याचबरोबर पुरवठा साखळीवरील खर्चही वाढतो. त्यामुळे दोन्ही कंपन्या या वाढत्या खर्चाचा ताळमेळ साधण्यासाठी अशा पावलं उचलत आहेत. रॅपिडोसारख्या नव्या फूड डिलिव्हरी सेवांच्या वाढत्या प्रभावामुळे झोमॅटो आपलं कमिशन मॉडेल अधिक परिणामकारक बनवण्याचा विचार करत आहे.
झोमॅटोच्या मते, बाजारातील बदलत्या परिस्थिती आणि वाढत्या ऑपरेशनल खर्चामुळे प्लॅटफॉर्म फी वाढवणं अपरिहार्य होतं. फेस्टिव सीझनमध्ये ऑर्डर वाढण्याची शक्यता लक्षात घेऊन कंपनी या काळात आपल्या महसुलात वाढ करण्याचा प्रयत्न करत आहे. मात्र, यामुळे ग्राहकांच्या ऑर्डर करण्याच्या क्षमतेवर परिणाम होऊ शकतो, असा तज्ज्ञांचा अंदाज आहे.
दरम्यान, झोमॅटोचा नफा मात्र गेल्या तिमाहीत घटला आहे. जून २०२५ संपलेल्या तिमाहीत कंपनीचा नफा ३६ टक्क्यांनी घटून २५ कोटी रुपयांवर आला. मागील तिमाहीत हा आकडा ३९ कोटी रुपयांचा होता. महसुलातील ही घसरण कंपनीसाठी चिंतेची बाब मानली जात आहे.
तरीही, शेअर बाजारात झोमॅटोची कामगिरी चांगली राहिली आहे. २ सप्टेंबर रोजी कंपनीचा शेअर ०५५ टक्क्यांनी वाढून ३२२.८५ रुपयांवर बंद झाला. गेल्या सहा महिन्यांत झोमॅटोच्या शेअरने तब्बल ४५ टक्क्यांची वाढ केली असून, गुंतवणूकदारांना चांगला फायदा दिला आहे.
