Pune News : पुन्हा एकदा ‘जोर का झटका’! ऐन सणासुदीच्या काळात वीजदरवाढ, प्रति युनिट ‘इतक्या पैशांची झाली वाढ…
Pune News पुणे : ऐन सणासुदीच्या काळात जनतेला वीजदरवाढीचा झटका सहन करावा लागणार आहे. वीज खरेदी खर्चात वाढ झाल्याने महावितरणकडून वीजबिलांत इंधन समायोजन आकार वसूल केला जाणार असून, परिणामी घरगुती वीज ग्राहकांना सप्टेंबरच्या बिलासाठी प्रति युनिट ३५ पैसे जादा द्यावे लागणार आहेत. Pune News
तसेच यासंदर्भात महावितरणच्या मुख्य अभियंतांनी (वीज खरेदी) आदेश काढले आहेत. महाराष्ट्र विद्युत नियामक आयोगाच्या मार्गदर्शक सूचनांप्रमाणे महावितरणकडून सप्टेंबरच्या वीजबिलात इंधन समायोजन आकार वसूल केला जाणार आहे, असे या आदेशात म्हटले आहे. ही वसुली येत्या काही महिन्यांत सुरू राहणार आहे.
त्यामुळे दारिद्र्यरेषेखालील, तसेच पाचशे युनिटपेक्षा अधिक वीज वापरकर्त्यांवरही परिणाम होणार आहे. यासोबतच कृषी वीजजोडणी असलेल्या ग्राहकांना प्रति युनिट दहा व पंधरा पैसे, तर औद्योगिक ग्राहकांना प्रति युनिट २० पैसे जादा द्यावे लागणार आहेत.
महावितरणला मार्च, एप्रिल व मे महिन्यांत अल्पकालीन करार व पॉवर एक्स्चेंजद्वारे अतिरिक्त वीज खरेदी करावी लागली होती. त्याची भरपाई म्हणून सप्टेंबर महिन्याच्या वीजबिलात इंधन समायोजन आकार वसूल केला जाणार आहे. अशी माहिती समोर आली आहे.
वीज ग्राहकांकडून नाराजी…
महाराष्ट्र राज्य वीज नियामक आयोगाने मार्च २०२०मध्ये इंधन समायोजन आकार शून्य केला होता. त्याची फेब्रुवारी २०२०पर्यंत अंमलबजावणी झाली. त्यानंतर गेल्या वर्षी मार्च, एप्रिल, मे महिन्यांत हा आकार सरासरी १५ ते २० पैसे प्रति युनिट होता.
दरम्यान, देशात कोळशाचा तुटवडा निर्माण झाल्याने वीज उत्पादनावर मोठा परिणाम झाला होता. परिणामी वीज वितरण कंपन्यांना खुल्या बाजारातून महागड्या दराने वीजखरेदी करावी लागली होती.
त्यामुळे पुन्हा गत वर्षी जून ते ऑक्टोबर या पाच महिन्यांच्या बिलात प्रति युनिटमागे कमीत कमी २५ पैशांपासून जास्तीत जास्त अडीच रुपयांपर्यंत वाढ करण्यात आली होती. आता पुन्हा सप्टेंबरच्या वीजबिलात हा आकार लावल्याने वीज ग्राहकांकडून नाराजी व्यक्त केली जात आहे.
