‘परदेश दौरे थांबवा, गावोगावी फिरा…’; अमित शाहांचा राहुल गांधींना थेट इशारा, पुण्यातील भाषणात नेमकं काय म्हणाले?
तळेगाव : काँग्रेस नेते राहुल गांधी यांच्या राजकीय भूमिकेवरून केंद्रीय गृहमंत्री अमित शाह यांनी पुणे दौऱ्यात जोरदार निशाणा साधला. भारताची प्रतिमा आंतरराष्ट्रीय स्तरावर मलिन करण्याचा प्रयत्न करून सत्तेपर्यंत पोहोचता येणार नाही, अशा शब्दांत शाह यांनी राहुल गांधींना सुनावले. केवळ परदेशात जाऊन सरकारवर टीका करण्याऐवजी देशातील जनतेमध्ये जाऊन काम करण्याचा सल्लाही त्यांनी दिला. तळेगाव येथे आयोजित कार्यक्रमात शाह यांनी राजकीय टीकेसोबतच महाराष्ट्रातील सहकार क्षेत्र आणि केंद्र सरकारच्या योजनांवरही भाष्य केले.
“भारताला बदनाम करून सत्ता मिळणार नाही. परदेश दौरे बंद करून गावोगावी फिरा, जनतेमध्ये काम करा, तर कधीतरी तुमचा नंबर लागू शकतो,” असे म्हणत अमित शाह यांनी राहुल गांधींवर थेट टीका केली. काँग्रेसला सलग तीन निवडणुकांमध्ये पराभवाचा सामना करावा लागला असून, त्याचा राग पक्षाकडून व्यक्त केला जात असल्याचा आरोपही त्यांनी केला. पंतप्रधान नरेंद्र मोदी यांची प्रतिमा मलिन करण्याचा प्रयत्न निषेधार्ह असल्याचे सांगत त्यांनी काँग्रेसच्या राजकारणावर प्रश्न उपस्थित केले. शाह यांच्या या वक्तव्यामुळे काँग्रेस आणि भाजपमधील राजकीय संघर्ष पुन्हा चर्चेत आला आहे.
सहकार क्षेत्रासाठी स्वतंत्र मंत्रालयाचा मुद्दा
राजकीय टीकेबरोबरच अमित शाह यांनी महाराष्ट्राच्या सहकार चळवळीचे महत्त्व अधोरेखित केले. देशात सहकार चळवळीची मुहूर्तमेढ रोवण्यात महाराष्ट्राचे योगदान मोठे असल्याचे त्यांनी नमूद केले. स्वातंत्र्यानंतर तब्बल ७० वर्षांनी पंतप्रधान नरेंद्र मोदी यांच्या नेतृत्वाखाली केंद्र सरकारमध्ये स्वतंत्र सहकार मंत्रालय स्थापन करण्यात आले. काँग्रेसच्या सत्ताकाळात शेतकऱ्यांकडून स्वतंत्र सहकार मंत्रालयाची मागणी केली जात होती; मात्र ती पूर्ण झाली नाही. भाजप सरकारने स्वतंत्र मंत्रालयाची स्थापना करून ही मागणी पूर्ण केल्याचा दावा शाह यांनी केला.
काँग्रेसच्या काळात अनेक साखर कारखाने बंद पडल्याचा उल्लेख करत, ते पुन्हा सुरू करण्यासाठी सध्या प्रयत्न सुरू असल्याचेही त्यांनी सांगितले. त्यामुळे सहकार क्षेत्राला नव्याने उभारी देण्याचा मुद्दा त्यांच्या भाषणात केंद्रस्थानी राहिला.
खासगी टॅक्सी कंपन्यांना पर्याय म्हणून ‘भारत टॅक्सी’
देशभरात सुरू करण्यात येणाऱ्या ‘भारत टॅक्सी’ सेवेची माहिती देताना शाह यांनी खासगी टॅक्सी कंपन्यांच्या कार्यपद्धतीवर टीका केली. अनेक कंपन्यांकडून चालकांचे शोषण होत असल्याचा आरोप त्यांनी केला. या पार्श्वभूमीवर सहकार तत्त्वावर आधारित भारत टॅक्सी सेवा सुरू केली जात असल्याचे त्यांनी स्पष्ट केले.
या सेवेत चालकांकडून कमिशन आकारले जाणार नाही आणि प्रवाशांकडून मिळणारे भाडे थेट चालकांपर्यंत पोहोचेल, अशी या संकल्पनेची भूमिका असल्याचे शाह यांनी सांगितले. मुंबई आणि पुण्यात ही सेवा सुरू झाली असून, पुढील टप्प्यात कोल्हापूर, नागपूर, नाशिक आणि सोलापूर येथेही ती सुरू करण्याची योजना आहे.
तळेगावात सहकारी संस्थेचे भूमिपूजन
दरम्यान, पुणे जिल्ह्यातील तळेगाव येथे नॅशनल हेवी इंजिनिअरिंग को-ऑपरेटिव्ह लिमिटेड या बहुराज्य सहकारी संस्थेच्या प्रकल्पाचे भूमिपूजन अमित शाह यांच्या हस्ते पार पडले. या कार्यक्रमाला केंद्रीय मंत्री मुरलीधर मोहोळ, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्यासह अन्य नेते उपस्थित होते.
महाराष्ट्राच्या राजकारणात दोन्ही राष्ट्रवादी काँग्रेस एकत्र येण्याच्या चर्चांना वेग आलेला असताना खासदार सुप्रिया सुळे यांनी या वृत्ताचे खंडन केले आहे. दुसरीकडे, मतदारसंघ पुनर्रचना विधेयक आगामी संसदेच्या हिवाळी अधिवेशनात पुन्हा मांडले जाण्याची शक्यता असल्याने राजकीय घडामोडींकडे लक्ष लागले आहे. अशा पार्श्वभूमीवर अमित शाह यांच्या पुणे दौऱ्यातील राहुल गांधींवरील टीका आणि सहकार क्षेत्राबाबतची भूमिका विशेष चर्चेचा विषय ठरली आहे.
