गौतमी पाटील आक्षेपार्ह ध्वनिचित्रफीत प्रकरणी तरुणाला जामीन मंजूर
मुंबई : लावणी नृत्यांगणा गौतमी पाटीलच्या नावे सोशल मीडियावर बनावट खाते उघडून क्षेपार्ह ध्वनिचित्रफीत प्रसारित केल्याप्रकरणी एकाला अतिरिक्त सत्र न्यायाधीश एस. बी. साळुंखे यांनी अटकपूर्व जामीन मंजूर केला आहे.
आयुष अमृत कणसे (वय २१, रा. भरतगाववाडी, जि. सातारा) असे अटकपूर्व जामीन मंजूर झालेल्याचे नाव आहे. त्याने ॲड. आकाश सुधीर चव्हाण यांच्यामार्फत अटकपूर्व जामीन मिळवण्यासाठी न्यायालयात अर्ज केला होता.
अर्जदार आरोपीच्या कुटुंबीयांनी त्याचा मोबाइल संच पोलिसांकडे तपासासाठी दिला आहे. त्यामुळे आरोपीच्या पोलीस कोठडीची गरज नाही, असा युक्तीवाद ॲड. आकाश सुधीर चव्हाण यांनी केला. न्यायालयाने बचाव पक्षाचा युक्तीवाद ग्राह्य धरून आयुष कणसे याचा अटकपूर्व जामीन मंजूर केला.
दरम्यान, या प्रकरणात एकाला अटक करण्यात आली असून दोन अल्पवयीन मुलांविरुद्ध गुन्हा दाखल करण्यात आला होता. सोशल मीडियावर बनावट खाते उघडून गौतमी पाटीलची ध्वनिचित्रफित प्रसारित करण्यात आल्याचा प्रकार उघडकीस आला होता.
दरम्यान, याप्रकरणी २५ फेब्रुवारी रोजी विमानतळ पोलीस ठाण्यात गुन्हा दाखल करण्यात आला होता. या गुन्ह्यातील सहआरोपीला जामीन मंजूर करण्यात आला आहे.
