लाडक्या बहिणींना मिळणार 6000 रुपये? योजनेबाबत मोठी माहिती आली समोर..
पुणे : मुख्यमंत्री माझी लाडकी बहीण योजनेतील लाभार्थी महिलांसाठी महत्त्वाची अपडेट समोर आली आहे. ई-केवायसी प्रक्रियेमुळे ज्या महिलांचे हप्ते थांबले होते, त्यांना आता प्रलंबित रक्कम एकरकमी मिळण्याची शक्यता व्यक्त केली जात आहे. त्यामुळे काही पात्र महिलांच्या खात्यात थेट 6 हजार रुपये जमा होण्याची शक्यता आहे.
राज्य सरकारच्या या योजनेअंतर्गत लाभ घेण्यासाठी ई-केवायसी प्रक्रिया अनिवार्य करण्यात आली होती. त्यासाठी अनेकदा मुदतवाढ देण्यात आली असून अंतिम मुदत 30 एप्रिल 2026 निश्चित करण्यात आली आहे. मात्र, अनेक महिलांनी वेळेत ई-केवायसी पूर्ण न केल्यामुळे त्यांना फेब्रुवारीपासून हप्ते मिळालेले नाहीत.
माहितीनुसार, अशा पात्र लाभार्थींना फेब्रुवारी, मार्च, एप्रिल आणि मे या चार महिन्यांचे थकीत हप्ते मिळण्याची शक्यता आहे. ही रक्कम दोन टप्प्यांत जमा केली जाऊ शकते. पहिल्या टप्प्यात फेब्रुवारी व मार्चचे 3 हजार रुपये आणि दुसऱ्या टप्प्यात एप्रिल व मेचे आणखी 3 हजार रुपये मिळून एकूण 6 हजार रुपये जमा होऊ शकतात.
महिला व बालविकास मंत्री यांनी स्पष्ट केले आहे की, योजनेतील कोणाचाही अर्ज कायमस्वरूपी रद्द करण्यात आलेला नाही. काही अर्जदार वय, उत्पन्न किंवा इतर निकष पूर्ण करत नसल्याचे तपासणीत आढळले आहे. तसेच काही लाभार्थींच्या नावावर वाहन नोंदणी असल्याची माहितीही समोर आली आहे.
ज्या महिलांनी ई-केवायसी पूर्ण केली आहे पण तरीही त्यांचा लाभ थांबला आहे, त्यांनी संबंधित विभागाशी संपर्क साधावा, असे आवाहन करण्यात आले आहे. सर्व प्रकरणांची पुन्हा तपासणी सुरू असून पात्र महिलांना लाभ मिळावा यासाठी शासन प्रयत्नशील असल्याचे सांगण्यात आले आहे.
