विद्यानंद बापट यांना मारहाण करणारा नेमका कोण? पोलिस तपासातून मोठी माहिती समोर
पुणे : डीजे आणि ध्वनीप्रदूषणाविरोधात भूमिका घेणारे सामाजिक कार्यकर्ते विद्यानंद बापट यांच्यावर टिळक रस्त्यावर झालेल्या हल्ल्याप्रकरणी संशयित आरोपीची प्राथमिक माहिती समोर आली आहे. संतोष चव्हाण असे संशयिताचे नाव असून, तो कोथरूडमधील राऊतवाडी परिसरात राहत असल्याची माहिती पोलिस तपासातून समोर आली आहे. दरम्यान, बापट यांची तक्रार आणि जबाब नोंदवण्याची प्रक्रिया सुरू आहे.
मुलाखत सुरू असतानाच अचानक हल्ला
टिळक रस्त्यावर एका माध्यम संस्थेला मुलाखत देत असताना बापट यांच्यावर संतोष चव्हाण याने अचानक हल्ला केल्याचे प्राथमिक तपासात समोर आले आहे. गणेशोत्सव आणि डीजेबंदीच्या मुद्द्यावर बापट यांनी केलेल्या वक्तव्याच्या पार्श्वभूमीवर हा प्रकार घडल्याची शक्यता व्यक्त केली जात आहे.
घटनेनंतर पोलिसांनी तातडीने तपास सुरू केला असून, बापट यांच्या तक्रारीनुसार संबंधित व्यक्तींवर कायदेशीर कारवाई केली जाणार असल्याचे पोलिसांनी स्पष्ट केले आहे.
गणेश मंडळाशी पूर्वीपासून संबंध
पोलिस तपासात संतोष चव्हाण हा राऊतवाडी परिसरातील ‘प्रियदर्शनी गणेश मंडळा’चा माजी अध्यक्ष असल्याची माहिती समोर आली आहे. सध्या तो एका स्थानिक बांधकाम व्यावसायिकाकडे काम करत असल्याचेही सांगण्यात येत आहे. त्यामुळे त्याचा गणेशोत्सवाशी पूर्वीपासून संबंध असल्याचे स्पष्ट होत आहे.
मात्र, बापट यांच्यावर हल्ला करण्यामागील नेमके कारण अद्याप स्पष्ट झालेले नाही. डीजेबंदीबाबतची भूमिका, गणेशोत्सवाशी संबंधित वक्तव्य किंवा अन्य कोणता स्थानिक अथवा वैयक्तिक वाद यापैकी नेमके कारण काय होते, याचा पोलिसांकडून तपास सुरू आहे.
हल्ल्यामागे आणखी कोणाचा सहभाग?
हा हल्ला अचानक झाला की त्यामागे पूर्वनियोजित कट होता, याचाही पोलिसांकडून तपास केला जात आहे. तसेच या घटनेत आणखी कोणाचा सहभाग आहे का, याची माहितीही घेतली जात आहे.
घटनास्थळावरील प्रत्यक्षदर्शी, उपलब्ध माहिती आणि बापट यांच्या जबाबाच्या आधारे तपास पुढे नेण्यात येत आहे. हल्ल्यानंतर संशयिताकडून बापट यांच्याविरोधात आक्रमक वक्तव्य करण्यात आल्याची माहितीही समोर आली आहे. मात्र, या वक्तव्यांची तसेच हल्ल्यामागील कारणांची अधिकृत पडताळणी अद्याप बाकी आहे.
त्यामुळे पोलिस तपास पूर्ण झाल्यानंतरच हल्ल्याचे नेमके कारण आणि या प्रकरणातील इतर व्यक्तींचा सहभाग स्पष्ट होणार आहे.
