खेळता खेळता चुलीत फटाका ठेवला अन् घडलं आक्रीत, पुण्यातील चिमुकल्यासोबत नेमकं काय घडलं?
पुणे : लहान लहानग्यांना नेहमीच आजूबाजूच्या गोष्टींची प्रचंड उत्सुकता असते. हीच उत्सुकता अनेकदा धोकादायक परिस्थितीला कारणीभूत ठरते. अशीच एक धक्कादायक घटना नुकतीच समोर आली आहे.
अवघ्या 6 वर्षांच्या एका चिमुकल्याने चुलीत फटाका ठेवला आणि काय होते याचा अनुभव घेण्यासाठी त्याकडे बारकाईने पाहू लागला. पण क्षणभरातच फटाका स्फोट झाला आणि त्याच्या डोळ्याला तसेच चेहऱ्याला गंभीर दुखापत झाली. मात्र वेळेवर योग्य वैद्यकीय उपचार झाल्याने त्याची दृष्टी वाचवण्यात डॉक्टरांना यश आले.
अगदी काही तासांचा विलंब झाला असता तर मुलाचे कायमस्वरूपी अंधत्व निश्चित होते. त्यामुळे तातडीने शस्त्रक्रिया करणे अत्यावश्यक होते. आपत्कालीन नेत्रशस्त्रक्रिया करण्यात आली. त्याचा फाटलेला डोळा काळजीपूर्वक शिवण्यात आला आणि बरे होण्यासाठी विशेष लेन्स बसवण्यात आली.
उपचारानंतर केवळ २४ तासांत मुलाने डोळा उघडला आणि जवळपास ८० टक्के दृष्टी परत आली. अवघ्या दोन आठवड्यांत त्याची दृष्टी पूर्णपणे पूर्ववत झाली. यशस्वी शस्त्रक्रियेनंतर डॉ. माने म्हणाल्या, ”या उपचारादरम्यान आम्ही वेळेशी स्पर्धा करत होतो.
दरम्यान, काही मिनिटांचा उशीरसुद्धा दृष्टी कायमची हरवू शकला असता. परंतु वेळेवर उपचार, आमच्या पथकाचे प्रयत्न आणि पालकांची जागरूकता यामुळे आज हा मुलगा पुन्हा आपले डोळे उघडून हसत आहे.
या घटनेतून एक महत्त्वाचा संदेश मिळतो. फटाक्यांशी संबंधित अपघात किती गंभीर ठरू शकतात हे या उदाहरणावरून स्पष्ट होते. लहान मुलांना फटाके हाताळू देणे किती धोकादायक असते, याची जाणीव पालकांनी ठेवणे आवश्यक आहे. मुलांच्या सुरक्षिततेसाठी पालकांनी त्यांच्यावर लक्ष ठेवणे, त्यांना फटाके वापरू न देणे किंवा सुरक्षिततेसाठी योग्य ती खबरदारी घेणे महत्त्वाचे आहे.
