आम्हीच इथले भाई, पुण्यात पुन्हा कोयता घेऊन तरुणांचा पुन्हा राडा!! अनेक वाहनांची तोडफोड…
पुणे : दिवसागणिक पुण्यातली गुन्हेगारी वाढते आहे असं म्हटलं तरी हरकत नाही. तसेच पुण्यात वारंवार कोयता गँगची दहशत चर्चेत असताना पुन्हा एकदा किरकोळ कारणावरून कोयते उपसत तरुणांनी दहशत माजवल्याचा प्रकार समोर आला आहे.
आम्हीच इथले भाई म्हणत तरुणांच्या जमावाने १० -१२ गाड्या फोडल्याचा प्रकार समोर आल्याने मोठी खळबळ उडाली आहे. पुण्यातील भवानी पेठ परिसरात पुन्हा एकदा कोयत्याने दहशत माजवणाऱ्या टोळक्याने शहराच्या सुरक्षेवर प्रश्नचिन्ह निर्माण केले आहे. किरकोळ कारणावरून संतप्त झालेल्या काही तरुणांनी हातात कोयते आणि तलवारी घेत परिसरात हिंसाचार घडवून आणला.
दरम्यान, या तरुणांनी थेट रस्त्यावर उतरून जवळपास १० ते १२ दुचाकी आणि चारचाकी वाहनांची तोडफोड केली. घटनेचा एक व्हिडिओ सध्या सोशल मीडियावर व्हायरल होत आहे. व्हिडिओमध्ये हे तरुण “आम्हीच इथले भाई, आमच्या नादी कोणी लागू नये” असा इशारा देत माजवलेल्या दहशतीमुळं नागरिकांमध्ये भीतीचं वातावरण निर्माण झालं आहे.
मिळालेल्या प्राथमिक माहितीनुसार, दोन गटांमध्ये किरकोळ वाद झाला होता. मात्र, हा वाद काही तासांतच हिंसक वळणावर गेला. मध्यरात्रीच्या सुमारास या तरुणांनी जमाव करून हातात धारदार शस्त्र घेऊन परिसरात दहशत निर्माण केली.
त्यांनी रस्त्यावर उभ्या असलेल्या अनेक वाहनांवर जोरदार हल्ला चढवत तोडफोड केली.घटनेची माहिती मिळताच पोलिसांनी तत्काळ घटनास्थळी धाव घेतली. या प्रकारामुळे भवानी पेठ परिसरात काही काळ तणावाचे वातावरण निर्माण झाले होते. पोलिसांनी परिसरात बंदोबस्त वाढवून नागरिकांना शांतता राखण्याचे आवाहन केले आहे.
