मुंबईत होळीचा ‘कडक’ पहारा! पोलिसांची नियमावली जाहीर; एक चूक पडू शकते महागात…
मुंबई : होळी आणि धुळवडीचा सण उत्साहात साजरा करताना कायदा व सुव्यवस्थेला कुठलाही धक्का लागू नये, यासाठी मुंबई शहरात कठोर नियमसंहिता लागू करण्यात आली आहे.
सणाच्या काळात कोणताही गैरप्रकार, जबरदस्तीने रंग लावणे, रंगीत पाण्याचे फुगे फेकणे, अश्लील वर्तन किंवा सार्वजनिक सुव्यवस्थेला बाधा आणणाऱ्या कृतींवर कठोर कारवाई करण्यात येणार असल्याचा इशारा देण्यात आला आहे.
मुंबई शहरात होळी आणि धुळवड मोठ्या उत्साहात साजरी केली जाते. त्यामुळे शहरातील सर्व सार्वजनिक ठिकाणे, गृहनिर्माण सोसायट्या, प्रमुख चौक, समुद्रकिनारे आणि गर्दीच्या भागांवर विशेष लक्ष ठेवण्यात येणार आहे. सर्व पोलीस ठाण्यांना सतर्कतेच्या सूचना देण्यात आल्या आहेत.
दरम्यान, होळी आणि त्यानंतरच्या धुळवडीच्या पार्श्वभूमीवर सणापूर्वीच पोलिसांनी तयारी सुरू केली आहे. सणाच्या दिवशी तसेच त्यानंतरही काही दिवस कडक बंदोबस्त ठेवला जाणार आहे.
मुंबई पोलीस प्रशासनाकडून ही नियमसंहिता लागू करण्यात आली आहे. कायदा व सुव्यवस्था राखण्यासाठी वरिष्ठ अधिकाऱ्यांच्या मार्गदर्शनाखाली विशेष पथके नियुक्त करण्यात आली आहेत. तसेच स्थानिक पोलीस ठाण्यांना गस्त वाढवण्याचे आदेश देण्यात आले आहेत.
सणाच्या उत्साहात काही ठिकाणी बेकायदेशीर कृत्ये, जबरदस्तीने रंग लावणे, महिलांशी गैरवर्तन, तसेच जातीय किंवा सामाजिक तणाव निर्माण होण्याच्या घटना घडण्याची शक्यता असते. तसेच होळीसाठी बेकायदेशीर वृक्षतोड होऊ नये, यासाठीही पोलिसांनी कडक भूमिका घेतली आहे. कोणत्याही प्रकारे सार्वजनिक शांततेला बाधा पोहोचू नये, हा यामागील मुख्य उद्देश आहे.
मुंबईत सर्वत्र कडक पोलीस बंदोबस्त ठेवण्यात येणार आहे. संवेदनशील भागांत अतिरिक्त पोलीस तैनात केले जातील. सीसीटीव्हीच्या माध्यमातून लक्ष ठेवले जाईल तसेच गस्त वाढवण्यात येणार आहे. रंगीत पाण्याचे फुगे फेकणे, वाहनचालकांना त्रास देणे किंवा सार्वजनिक ठिकाणी अश्लील वर्तन केल्यास संबंधितांवर तात्काळ कारवाई केली जाईल.
