जून महिन्यात बदलणार ‘हे’ १० नियम, तुमच्या खिशावर थेट होणार परिणाम, जाणून घ्या..

पुणे : जून महिन्याची सुरुवात होत आहे. पण याच जून महिन्याच्या एक तारखेपासून अनेक आर्थिक गोष्टींच्या संबंधित नियमांत बदल होणार आहेत. या बदलांचा थेट परिणाम सर्वसामान्यांच्या दैनंदिन व्यवहारांवर आणि मासिक बजेटवर होणार आहे.

बँकिंग, गॅस दर, पीएफ सुविधा, क्रेडिट कार्ड सेवा, यूपीआय व्यवहार यांसारख्या क्षेत्रांमध्ये बदल होणार असल्याने नागरिकांनी याची माहिती घेतली पाहिजे.

कोणते बदल होणार?

एलपीजी सिलेंडर दर बदल..

प्रत्येक महिन्याच्या पहिल्या दिवशी गॅस सिलिंडरचे दर बदलतात. १ जूनला घरगुती व व्यावसायिक गॅसच्या किमतीत वाढ किंवा कपात होऊ शकते. गृहिणींच्या बजेटवर याचा थेट परिणाम होऊ शकतो.

EPFO 3.0 नवे व्हर्जन..

१ जूनपासून ईपीएफओचं नवं EPFO 3.0 व्हर्जन लागू होणार आहे. यामुळे PF काढणे, केवायसी अपडेट करणे व क्लेम प्रक्रिया पूर्वीपेक्षा जलद होणार आहे. EPF संबंधित कार्ड देखील एटीएमसारखं वापरण्याची सुविधा देण्यात येणार आहे.

क्रेडिट कार्ड रिवॉर्ड्स व चार्जेस..

कोटक महिंद्रा बँकसह काही बँका क्रेडिट कार्डवरील रिवॉर्ड पॉइंट्सची मर्यादा निश्चित करणार आहेत. ऑटो-डेबिट फेल्युअरसाठी दंड कमी होणार असून फ्युअल व युटिलिटी बिल भरण्यावर अतिरिक्त चार्ज आकारला जाऊ शकतो.

युटिलिटी बिलावर शुल्क लागू..

क्रेडिट कार्डद्वारे वीज, पाणी यांसारखी युटिलिटी बिले भरताना काही बँका अतिरिक्त शुल्क लागू करू शकतात. तसेच, कॅशबॅकच्या अटींमध्ये बदल होण्याची शक्यता आहे.

म्युच्युअल फंड कट-ऑफ टाइम..

SEBI ने ओव्हरनाईट म्युच्युअल फंडसाठी नवा कट-ऑफ टाइम लागू केला आहे. ऑफलाइन व्यवहारांसाठी दुपारी ३ वाजेपर्यंत व ऑनलाइनसाठी संध्याकाळी ७ वाजेपर्यंतचा वेळ लागू होणार आहे.

आधार अपडेटसाठी शेवटची तारीख..

१४ जून २०२५ ही आधार अपडेट करण्याची शेवटची फ्री तारीख आहे. त्यानंतर ऑफलाईन अपडेटसाठी ₹२२ तर आधार केंद्रावर ₹५० शुल्क आकारले जाईल.

UPI व्यवहारात रिसिव्हरचं नाव दिसणार..

NPCI च्या नव्या नियमानुसार UPI व्यवहार करताना आता रेसिव्हरचं बँकेत असलेलं नाव दिसेल. QR कोडवर फसवणूक टाळण्यासाठी हे पाऊल उचलण्यात आले आहे. हा नियम ३० जूनपर्यंत सर्व अॅप्ससाठी लागू करावा लागेल.

बँकांना १२ दिवस सुट्टी..

जून महिन्यात एकूण १२ दिवस बँका बंद राहतील. यात रविवार, दुसरा आणि चौथा शनिवार, तसेच बकरी ईदसारख्या सणांची सुट्टी यांचा समावेश आहे. त्यामुळे व्यवहार आधीच आटोपावेत.