Thane News : नवरा गाढ झोपेत असताना भयंकर कृत्य! तिने वर्षभराच्या लेकराला उचललं अन्…; घटनेने सगळेच हादरले
Thane News : सासू, सुनेच्या भांडणात अवघ्या १ वर्षीय बालकाला जीव गमवावा लागल्याची धक्कादायक घटना उघडकीस आली आहे. ही घटना शहापूर तालुक्यातील कासणे गावात घडली आहे. घरगुती भांडणातून जन्मदात्या आईनेच पोटच्या मुलाला पाण्याने भरलेल्या टाकीत बुडवून ठार मारल्याने एकच खळबळ उडाली आहे.
अपेक्षा भोई (वय. २२) हिच्या विरोधात पोलीस ठाण्यात गुन्हा दाखल करून पोलिसांनी अटक केली आहे. पार्थ असे हत्या झालेल्या बाळाचे नाव आहे.
मिळालेल्या माहिती नुसार, भिवंडी तालुक्यातील पडघा पोलीस ठाण्याच्या हद्दीत कासणे गावात भोई यांचे कुटुंब राहते. संदेश यांचा विवाह २०२२ मध्ये अपेक्षा हिच्याशी झाला होता आणि आरोपी अपेक्षा आणि संदेश या दाम्पत्याला वर्षभरापूर्वी पार्थ झाला होता.
परंतु त्याला जन्मतःच ह्रदयविकार असल्याने त्याच्यावर मुंबईतील वाडिया रुग्णालयात उपचार सुरु होते. आजारी मुलगा जन्माला घातला यावरुन अपेक्षा आणि तिच्या सासू यांच्यात नेहमीच खटके उडत होते. तर, दुसरीकडे मृत मुलगा मीच सांभाळ करून या मुलावर माझाही हक्क असल्यानं सासू सुनेत नेहमीच घरात वाद होत होते. Thane News
त्यातच आरोपी अपेक्षाची सासू मंगळवारी पार्थ याला घेऊन टिटवाळा येथे नंदेकडे गेली होती. तेथील हवामान आजारी पार्थला काही मानवले नाही. बदललेल्या हवामानामुळे त्याला ताप आला. म्हणून सासू पार्थला घेऊन पुन्हा मंगळवारी रात्री घरी कासणे गावी आली. पार्थची प्रकृती बिघडल्याने अपेक्षा आणि सासूमध्ये रात्री जोरदार भांडण झाले. हे भांडण मिटवून संदेश कामावर गेला होता.
त्यानंतर बुधवार पहाटे रात्रपाळीवरुन संदेश घरी आला मुलासोबत खेळता खेळता गाढ झोपला असतानाच आई अपेक्षाने सर्वांची नजर चुकवून पहाटेच्या सुमारास घराच्या पहिल्या माळ्यावर ५ हजार लिटर पाण्याने भरलेल्या टाकीत पार्थला बुडवून त्याची हत्या केली.
नंतर मृत मुलाचे वडील संदेश यांनी आपला पार्थ दिसत नसल्याचं सांगितलं, त्यानंतर कुटुंबासह मित्रांनी त्याचा शोध घेतला. तर, दुसरीकडे पार्थ हरवल्याचा कांगावा आरोपी आईने केला.
मात्र, पती संदेशला पत्नीवर ती कांगावा करून खोटा बोलत असल्याचा संशय आला आणि पती संदेशने तिची अधिक चौकशी केली असता, तिने मुलाला पाण्याच्या टाकीत बुडवून मारल्याचं सांगितलं. त्यानंतर संदेश भोई यांच्या फिर्यादीवरून पडघा पोलिसांनी अपेक्षाला ताब्यात घेऊन अटक केली आहे.
