Shirur : आमदार अशोक पवार यांच्या मुलाच्या अपहरण प्रकरणी भयंकर माहिती समोर, कार्यकर्त्यानेच केलं कृत्य, नेमकं काय घडलं?

Shirur : शिरुर विधानसभा मतदारसंघातील राष्ट्रवादी काँग्रेस शरदचंद्र पवार या पक्षाचे उमेदवार अशोक पवार यांच्या मुलाचं अपहरण करुन त्याला मारहाण करण्यात आल्याचा धक्कादायक प्रकार समोर आला होता.

आमदार अशोक पवार यांचे सुपुत्र व रावसाहेब पवार घोडगंगा सहकारी साखर कारखान्याचे अध्यक्ष ऋषीराज पवार (वय. २६) यांचे एका टोळीने अपहरण करून मारहाण केली. हे अपहरण १० कोटी रुपयांच्या खंडणीसाठी केल्याची माहिती मिळाली आहे. याप्रकणी आता महत्वाची माहिती समोर आली आहे.

या मारहाण प्रकरणातील मुख्य आरोपी हा महाविकास आघडीचे उमेदवार अशोक पवार यांचा कार्यकर्ता आहे. तर आमदार पुत्र ऋषीराज पवारचा तो मित्र आहे. लोकसभा निवडणुकीत डॉ.अमोल कोल्हे यांचा तो बूथ प्रमुखही होता. Shirur

दरम्यान, यामुळे अशोक पवारांनी या गोष्टीच राजकीय भांडवल करू नये असा थेट इशारा शिरुर तालुका राष्ट्रवादी कॉंग्रेस अजित पवार गटाचे तालुका अध्यक्ष रवी बापू काळे यांनी दिला आहे.

नेमकं प्रकरण काय?

शिरूर हवेली मतदारसंघातील राष्ट्रवादी काँग्रेसचे (शरद पवार) गटाचे उमेदवार अशोक पवार यांच्या मुलाचे अपहरण करण्यात आले होते. त्याला जबरीने विवस्त्र करून एका महिलेसोबत आणून त्या महिलेला विवस्त्र करून फोटो काढण्यात आल्याची धक्कादायक घटना घडली.

शिरूर तालुक्यातील मांडवगण फराटा इथं सर्व प्रकार घडला. आमदार अशोक पवार यांच्या मुलाला बेदम मारहाण करण्यात आली होती. ऋषीराज पवार असे आमदार अशोक पवार यांच्या मुलाचे नाव आहे. ऋषीराज पवार हा घोडगंगा साखर कारखाण्याचा चेअरमन सुद्धा आहे.

काहीजण आपल्या पक्षात प्रवेश करणार आहेत असं सांगून आमदार अशोक पवार यांचा मुलगा ऋषीराजला भाऊ कोळपेसह इतर दोन अनोळखी लोक घेऊन गेले. दुचाकीवरून ऋषीराजला एका बंगल्यात नेलं. तिथं बेडरूममध्ये डांबून ठेवलं आणि मारहाण करण्यात आली.

तसंच गळा आवळून त्याला कपडे काढायला लावले. तेव्हा एका अनोळखी महिलेला बोलावून तिलाही विवस्त्र करण्यात आलं. तिच्यासोबत अश्लील कृत्य करायला लावून त्याचा व्हिडीओ शूट केला आणि तो व्हायरल करण्याची धमकी देत १० कोटींची खंडणी मागण्यात आली.