शरद पवार पोहोचले नितीन गडकरींच्या घरी , राजकीय चर्चांना उधाण…!
नागपूर : राज्याच्या राजकारणात सध्या भेटीगाठीच्या घडामोडींना वेग आला आहे. शिवसेनेच्या मंत्र्यांनी राष्ट्रवादीचे अध्यक्ष शरद पवार यांची घरी जाऊन भेट घेतली. त्यानंतर आज शनिवारी नागपूरमध्ये शरद पवार हे भाजपचे नेते आणि केंद्रीय मंत्री नितीन गडकरींच्या घरी पोहोचले आहेत. या भेटीमुळे राजकीय चर्चांना उधाण आले आहे.
राष्ट्रवादीचे अध्यक्ष शरद पवार आजपासून दोन दिवस नागपूरच्या दौ-यावर आहेत. आज सकाळीच त्यांचे नागपूर विमानतळावर आगमन झाले. यावेळी राष्ट्रवादी काँग्रेस पक्षाच्या कार्यकर्त्यांनी शरद पवार यांचे स्वागत केले. एका कार्यक्रमाला हजेरी लावल्यानंतर शरद पवार हे नितीन गडकरी यांच्या निवासस्थानी पोहोचले.
केंद्रीय मंत्री नितीन गडकरी आणि शरद पवार यांची बैठक सुरू आहे. यावेळी त्यांच्यासोबत अनिल देशमुखही आहेत. विविध राजकीय आणि कृषीच्या मुद्यांवर चर्चा होण्याची शक्यता आहे. तसेच शरद पवार हे नितीन गडकरी यांच्या घरी जेवण करणार आहेत.
दरम्यान, शुक्रवारी संध्याकाळी शिवसेनेचे नेते आणि उद्योग मंत्री उदय सामंत आणि शिवसेना प्रतोद भरत गोगावले हे राष्ट्रवादीचे अध्यक्ष शरद पवार यांचे निवास्थान असलेल्या ‘सिल्व्हर ओक’वर पोहोचले. अचानक शिवसेनेचे नेते ‘सिल्व्हर ओक’वर आल्यामुळे आश्चर्य व्यक्त केले जात आहे. दोन्ही नेत्यांनी शरद पवार यांच्यासोबत चर्चा केली. या भेटी वेळी प्राध्यापक प्रदीप ढवळ हे देखील उपस्थित होते. ही भेट कशा संदर्भात होती या संदर्भात कोणताही खुलासा करण्यात आला नसल्यामुळे भेटीचे कारण गुलदस्त्यातच असल्याचे समजते.
