टायगर श्रॉफवर अगदी जवळून सात गोळ्या झाडल्या, तरीही जीव वाचला! समोर आली दोन महत्त्वाची कारणं..
मुंबई : बॉलिवूड अभिनेता टायगर श्रॉफ याच्यावर रविवारी रात्री मुंबईतील जुहू परिसरात गोळीबार झाल्याची घटना समोर आली. लॉरेन्स बिश्नोई गँगच्या शूटरांनी टायगरच्या कारवर सात गोळ्या झाडल्याची माहिती आहे.
या हल्ल्यात टायगर श्रॉफ सुदैवाने बचावला; मात्र त्याचा चालक फिरदौस आणि आणखी एक व्यक्ती जखमी झाल्याचे सांगण्यात येत आहे. या घटनेनंतर टायगर श्रॉफ या जीवघेण्या हल्ल्यातून नेमका कसा बचावला, याची चर्चा सुरू झाली आहे.
गोळीबार सुरू असताना टायगरने प्रसंगावधान दाखवल्याचे सांगितले जात आहे. त्यानंतर त्याने स्वतः गाडीचा ताबा घेत जखमी चालकाला रुग्णालयात नेल्याची माहिती समोर आली आहे. या हल्ल्यातून टायगर बचावण्यामागे दोन प्रमुख कारणे असल्याचे वृत्तांतून समोर आले आहे.
टायगर श्रॉफ गाडीत खाली झोपला अन्… प्रत्यक्षदर्शी महिलेने सांगितला थरार
या घटनेची प्रत्यक्षदर्शी असल्याचा दावा करणाऱ्या एका महिलेने हल्ल्याच्या वेळी नेमकं काय घडलं, याची माहिती दिली. टायगर श्रॉफ गाडीतून निघत असताना त्याला पाहण्यासाठी चाहत्यांची मोठी गर्दी जमली होती. त्याच परिसरात काही हल्लेखोरही उभे होते. ते देखील टायगरला पाहण्यासाठी आले असावेत, असा सुरुवातीला लोकांचा समज झाला.
गोळीबाराचा आवाज ऐकू आल्यानंतर सुरुवातीला काही जणांना टायगरच्या स्वागतासाठी फटाके वाजवले जात असल्याचा भास झाला. मात्र, काही वेळातच गोळ्या झाडल्या जात असल्याचे त्यांच्या लक्षात आले.
महिलेच्या म्हणण्यानुसार, गोळीबार सुरू होताच टायगर गाडीत खाली झोपला. त्यामुळे तो थेट गोळ्यांच्या माऱ्यापासून बचावला असावा, असा अंदाज व्यक्त केला जात आहे. मात्र, या घटनेचा नेमका घटनाक्रम तपासातून स्पष्ट होणे आवश्यक आहे.
हल्लेखोराची बंदूक लॉक झाली अन् टायगरचा जीव वाचला?
टायगर श्रॉफ या हल्ल्यातून बचावण्यामागे दुसरे कारण म्हणजे एका हल्लेखोराच्या बंदुकीत ऐनवेळी बिघाड झाल्याची माहिती समोर आली आहे. मिळालेल्या वृत्तानुसार, दोन हल्लेखोरांनी टायगरच्या कारवर गोळीबार केला, तर तिसरा आरोपी दुचाकीवर थांबला होता.
यातील एका हल्लेखोराने कारच्या समोरून गोळ्या झाडल्या. दुसरा हल्लेखोर टायगर बसलेल्या बाजूच्या खिडकीजवळ गेला आणि त्याने त्याच्या दिशेने गोळीबार करण्याचा प्रयत्न केला. मात्र, बंदूक लॉक झाल्यामुळे त्याला पुढील गोळ्या झाडता आल्या नाहीत, अशी माहिती समोर आली आहे.
हल्लेखोराची बंदूक व्यवस्थित चालली असती, तर टायगरला गंभीर दुखापत होण्याची शक्यता होती, असा अंदाज व्यक्त केला जात आहे. मात्र, बंदुकीतील बिघाड आणि टायगरने वेळीच घेतलेली सावध भूमिका यामुळे मोठा अनर्थ टळल्याचे सांगितले जात आहे.
गोळीबारानंतर टायगरने स्वतः घेतला गाडीचा ताबा
या घटनेतील आणखी एक महत्त्वाची बाब म्हणजे गोळीबारानंतर टायगर श्रॉफने प्रसंगावधान दाखवल्याचे वृत्त आहे. चालक जखमी झाल्यानंतर टायगरने स्वतः गाडीचा ताबा घेतला आणि त्याला रुग्णालयात नेले, अशी माहिती समोर आली आहे.
दरम्यान, या गोळीबारामागील नेमके कारण, हल्ल्यातील आरोपींची भूमिका आणि घटनेशी संबंधित इतर बाबींचा तपास सुरू आहे. प्रत्यक्षदर्शींचे म्हणणे आणि तपासातून समोर येणारी माहिती यांच्या आधारे या प्रकरणातील संपूर्ण घटनाक्रम स्पष्ट होणार आहे.
