यवत पोलीस ठाण्याचे डॅशिंग हवालदार संदीप कदम यांचे अखेर निधन, अनेक गुन्ह्यांचा लावला होता छडा..
पुणे : यवत पोलिस ठाण्यातील पोलिस हवालदारसंदीप जगन्नाथ कदम (वय ४३, रा. बारामती मूळगाव – लासुर्णे ता. इंदापूर) यांचे उपचारादरम्यान अखेर सोमवारी (ता. २५) दुपारी निधन झाले.
बारामती-भिगवण रस्त्यावरील हॉटेल अभिषेकसमोर शुक्रवारी (ता. २२) सायंकाळी साडेपाच वाजनेच्या सुमारास संदीप जगन्नाथ कदम हे पायी जात असताना एका टेम्पोने त्यांना जोरदार धडक दिली.
यामध्ये कदम हे गंभीररित्या जखमी झाले होते. संदीप कदम यांना दोन दिवस पुण्यातील एका बड्या रुग्णालयात उपचारासाठी दाखल केले होते. तर काल (रविवार) दुपार पासुन त्यांच्यावर बारामती शहरातील एका खाजगी रुग्णालयात उपचार सुरु होते.
उपचारादरम्यान आज (सोमवारी) दुपारी त्यांची प्राणज्योत मालवली. संदीप कदम यांच्यावर अंत्यसंस्कार लासुर्णे (ता. इंदापुर) येथे आज (सोमवारी) सायंकाळी पाच वाजता वाजता होणार आहेत.
गुन्हेगारांना थेट अंगावर घेणारा पोलीस कर्मचारी म्हणून संदीप कदम यांची ओळख आहे. संदीप कदम यांच्या मृत्युती खबर मिळताच, पोलिस दलातील त्यांच्या अनेक सहकाऱ्यांना मोठा धक्काच बसला आहे.
इंदापूर तालुक्यातील लासुर्णे या गावचे रहिवाशी असलेल्या संदीप कदम यांनी बारामती शहर, जिल्हा (ग्रामीण) पोलिसांची स्थानिक गुन्हे अन्वेषण शाखा व लोणी काळभोर पोलिस ठाण्यात यापूर्वी कर्तव्य बजावले आहे.
मागील तीन वर्षांपासून संदीप कदम हे यवत पोलिस स्टेशन अंतर्गत असलेल्या पाटस पोलिस चौकीत हवालदार म्हणून कार्यरत आहेत. संदीप कदम यवत पोलिस ठाण्याच्या गुन्हे शोध पथकात कार्यरत असून, त्यांनी आपल्या कौशल्याने अनेक गुन्ह्याची उकल केलेली आहे.
