दहीहंडीच्या दिवशी राज्यात पावसाची जोरदार एंट्री! ‘या’ जिल्ह्यांना अलर्ट; कुठे बरसणार मुसळधार पाऊस?
पुणे : गेल्या काही दिवसांपासून राज्यातील अनेक भागांत पावसाचा जोर ओसरला आहे. त्यामुळे शेतकरी आणि नागरिक पुन्हा पावसाच्या प्रतीक्षेत आहेत. जुलै महिन्यात राज्यात अनेक ठिकाणी मुसळधार पाऊस झाला होता. मात्र, ऑगस्ट महिन्यात पावसाचा जोर लक्षणीयरीत्या कमी झाला. आता दहीहंडी उत्सवाच्या पार्श्वभूमीवर राज्यात पुन्हा पावसाचे वातावरण निर्माण होण्याची शक्यता आहे.
हवामान विभागाने मुंबईसह राज्यातील काही भागांसाठी पावसाचा इशारा दिला आहे. त्यामुळे पावसाच्या प्रतीक्षेत असलेल्या नागरिकांना काहीसा दिलासा मिळण्याची शक्यता आहे. मुंबईसह उत्तर कोकणातील काही भागांत ५ सप्टेंबरपर्यंत पावसाची शक्यता वर्तवण्यात आली आहे.
जुलै महिन्यात मुंबईत मुसळधार पावसाने जोरदार हजेरी लावली होती. मात्र, ऑगस्टमध्ये पावसाचा जोर कमी झाल्याने शहरात ढगाळ आणि दमट वातावरण कायम राहिले. अपेक्षेप्रमाणे पाऊस न झाल्याने नागरिकांना उकाड्याचा सामना करावा लागला. आता काही दिवसांच्या विश्रांतीनंतर मुंबईत पुन्हा पावसाचा जोर वाढण्याची शक्यता आहे.
मुंबई शहर आणि उपनगरांमध्ये ढगाळ वातावरणासह पावसाच्या सरी कोसळण्याची शक्यता आहे. अचानक हवामानात बदल होण्याची शक्यता असल्याने नागरिकांनी सतर्क राहावे, असे आवाहन करण्यात आले आहे. मुसळधार पाऊस झाल्यास रस्ते वाहतूक, रेल्वे सेवा आणि दैनंदिन वाहतुकीवर परिणाम होण्याची शक्यता आहे.
दरम्यान, आज राज्यातील बहुतांश भागांत पावसाचा जोर कमी राहण्याचा अंदाज आहे. धुळे, गडचिरोली, चंद्रपूर आणि गोंदिया या चार जिल्ह्यांना हवामान विभागाने यलो अलर्ट दिला आहे. तर नंदूरबार, जळगाव, नाशिक, छत्रपती संभाजीनगर, परभणी, सोलापूर, जालना आणि सांगली जिल्ह्यांत तुरळक पावसाची शक्यता वर्तवण्यात आली आहे. मध्य महाराष्ट्रात मात्र आज पावसाची शक्यता कमी असल्याचा अंदाज आहे.
उद्या, ५ सप्टेंबर रोजी नाशिक, नंदूरबार, नांदेड आणि धुळे या जिल्ह्यांत हलक्या ते रिमझिम पावसाची शक्यता आहे. या जिल्ह्यांव्यतिरिक्त राज्यातील इतर भागांसाठी कोणताही मोठा पावसाचा अलर्ट देण्यात आलेला नाही.
हवामान विभागाच्या अंदाजानुसार, सप्टेंबरच्या पहिल्या आठवड्यात राज्यात पाऊस सरासरीपेक्षा कमी राहण्याची शक्यता आहे. तर १० ते १७ सप्टेंबरदरम्यान विदर्भात तुलनेने अधिक पाऊस होण्याची शक्यता आहे. या कालावधीत उर्वरित महाराष्ट्रात पावसाचे प्रमाण मध्यम ते सामान्य राहण्याचा अंदाज आहे.
