पुणे महापालिकेचा पब आणि रेस्टॉरंट्सला दणका; वडगाव शेरीसह’ या’ भागात धडक कारवाई, कारण…

पुणे : पुणे महापालिकेने वडगाव शेरीसह कल्याणीनगर परिसरातील अनधिकृत रेस्टॉरंट्स आणि पबला मोठा दणका दिला आहे. महापालिकेकडून या ठिकाणी कारवाई करण्यात येत आहे. अनधिकृतरित्या सुरू असलेल्या रेस्टॉरंट्स, पब आणि व्यावसायिक आस्थापनांमुळे स्थानिक नागरिकांना मोठ्या प्रमाणावर त्रास सहन करावा लागत आहे. साइड आणि फ्रंट मार्जिनसह इमारतींच्या गच्च्यांवर परवानगीशिवाय सुरू असलेल्या या व्यवसायांवर अखेर पुणे महापालिकेने कारवाईची मोहीम सुरू केली आहे.

शहरातील नगर रस्ता क्षेत्रीय कार्यालयाच्या हद्दीत करण्यात आलेल्या पाहणीत 151 व्यावसायिकांनी नियमबाह्य पद्धतीने जागांचा वापर केल्याचं समोर आलं आहे. या सर्वांना मिळकतकर विभागामार्फत नोटिसा बजावण्यात आल्या असून, एकूण 22 लाख 76 हजार रुपयांचा अतिरिक्त कर वसूल करण्याची प्रक्रिया सुरू आहे.पुणे महापालिकेकडून करण्यात आलेल्या या मोहिमेत मिळकतींची भौतिक पाहणी करण्यात आली असता, 47 मिळकती कायदेशीर परवानगीनुसार वापरात असल्याचे आढळले. मात्र, 44 ठिकाणी साइड मार्जिनचे उल्लंघन, वाढीव बांधकाम आणि अनधिकृत व्यावसायिक वापर स्पष्टपणे निदर्शनास आले.

दरम्यान या मिळकतींवर ‘अ-फॉर्म’ तयार करून अतिरिक्त कर आकारणीची प्रक्रिया सुरू करण्यात आली आहे. त्यामुळे पब आणि रेस्टॉरंट्सला दणका बसणार आहे.