Pune Crime : पुण्यात गुन्हेगारी वाढली, आता मुंढव्यात तरुणाला पिस्तुल दाखवून धमकावले अन्…

Pune Crime : दिवसागणिक पुण्यातली गुन्हेगारी वाढते आहे असं म्हटलं तरी हरकत नाही. कोयता घेऊन रस्त्याने फिरणे, टोळा धाडी, गाड्या जाळणे एवढंच नाही तर शुल्लक रकमेसाठी हात तोडण्यासारख्या अंगावर काटा आणणारे प्रकार सध्या पुण्यात वेगात वाढले आहेत.सध्या असाच एक प्रकार समोर आला आहे.

भांडण सोडवण्यासाठी गेलेल्या तरुणाला पिस्टलच्या उलट्या बाजूने डोक्यात मारुन त्याच्यावर पिस्टल रोखून जीवे मारण्याची धमकी दिली. हा प्रकार मुंढवा येथील केशवनगर येथे रविवारी (ता. ५) रात्री साडेसात वाजता घडला आहे. याप्रकरणी तीन जणांवर मुंढवा पोलीस ठाण्यात गुन्हा दाखल करुन दोघांना अटक करण्यात आली आहे. Pune Crime

याप्रकरणी कौशल लक्ष्मण पायघन (वय. २१ रा. केशवनगर, मुंढवा, पुणे) यांनी मुंढवा पोलीस ठाण्यात फिर्याद दिली आहे. याप्रकरणी सिद्धार्थ शावळकर (वय.२० रा. केशवनगर) आणि राहुल धावरे (वय. २१ रा. वडगाव शेरी) यांना अटक केली आहे. तर सुमित गौड (वय. २२ रा. वडगाव शेरी, पुणे) याच्यावर गुन्हा दाखल करण्यात आला आहे.

मिळालेल्या माहिती नुसार, फिर्यादी कौशल हे केशवनगर येथे मित्राला भेटण्यासाठी गेले होते. त्यावेळी त्याच्या तोंडओळखीचा मुलगा प्रविण सिंग याला आरोपी मारहाण करत होते. कौशल त्यांची भांडणे सोडवण्यासाठी गेले असता राहुल धावरे याने गळा दाबून ढकलून दिले.

तर सुमित गौड याने त्याच्या कंमरेला लावलेली पिस्टल काढून उलट्या बाजूने फिर्यादी यांच्या डोक्यात मारुन गंभीर जखमी केल. तसेच इतर आरोपींनी लाथाबुक्क्यांनी मारहाण केली. सुमित गौड याने फिर्यादी यांच्यावर पिस्टल रोखून जीवे मारण्याची धमकी दिली. आरोपीने पिस्टल काढल्याचे पाहून परिसरात जमा झालेले लोक पळून गेले. या घटनेचा पुढील तपास मुंढवा पोलीस करीत आहेत.