Pune Crime : धक्कादायक! पुण्यात महाविद्यालयीन मुलीवर चौघांकडून अत्याचार, ओळख वाढवून वेगवेगळ्या ठिकाणी नेलं अन्…

Pune Crime : शिक्षणाचं माहेरघर आणि रांस्कृतिक राजधानी असलेल्या पुण्यात गेल्या काही दिवसांपासून महिला अत्याचाराच्या घटना समोर येत आहेत. सध्या अशीच एक धक्कादायक घटना उघडकीस आली आहे.

एका नामांकित महाविद्यालयात शिकणाऱ्या अल्पवयीन मुलीवर चौघांनी लैंगिक अत्याचार केल्याची माहिती समोर आली आहे. या प्रकरणात कोरेगाव पार्क पोलिसांनी चार आरोपींविरोधात गुन्हा दाखल केला असून, त्यांना अटक करण्यात आली आहे. अटक करण्यात आलेल्या आरोपींपैकी दोन तरुण हे अल्पवयीन आहेत.

पोलिसांनी दिलेल्या माहितीनुसार, पीडित तरुणी ही कोरेगाव पार्क पोलीस ठाण्याच्या हद्दितील एका नामांकित महाविद्यालयात शिक्षण घेत आहे. महाविद्यालयात सुरू असलेल्या “गुड टच बॅड टच” या उपक्रमातून ही घटना समोर आली आहे.

हा सगळा प्रकार एप्रिलपासून सुरू होता. पीडित तरुणी तिच्या वडिलांच्या फोनवरून सोशल मीडिया वापरत होती आणि यावरूनच आरोपी तरुणांशी तिची मैत्री झाली. दरम्यान, हे चारही आरोपी तरुण एकमेकांना ओळखत नाहीत. या घटना वेगवेगळ्या घडलेल्या आहेत.

यातील एका आरोपीने तिला भेटण्यासाठी बोलावून तिच्यावर महाविद्यालयात बलात्कार केला. तर दुसऱ्या आरोपीने तिच्या घरीच तिच्यावर अत्याचार केला. यातील उर्वरीत दोन आरोपींनी या तरुणीला वेगवेगळ्या ठिकाणी नेऊन तिच्यावर अत्याचार केला. या घटनेचे काही व्हिडीओ देखील बनवण्यात आले आहेत. Pune Crime

दरम्यान या सर्व घटना पीडित तरुणीने तिच्या मैत्रिणीला सांगितल्या. त्यानंतर महाविद्यालयात ‘गुड टच बॅड टच’ उपक्रम राबवण्यात आला होता. त्यानंतर याची माहिती त्यांनी या उपक्रमाच्या समुपदेशकाला दिली. त्यातून ही घटना उघडकीस आली आहे.

या प्रकरणी पालकांनी पोलीस ठाण्यात धाव घेतील असून, चारही आरोपींविरोधात पोस्को अंतर्गत गुन्हा दाखल करण्यात आला आहे, चारही आरोपींना अटक देखील करण्यात आली. घटनेबाबत अधिक तपास सुरू असल्याची माहिती पोलिसांकडून देण्यात आली आहे.