बायकोशी बोलतो काय म्हणत एकास बेदम मारहाण; आळंदीतील घटना
पुणे : बायकोशी बोलत असल्याच्या संशयावरुन एकाला लोखंडी पाईपने बेदम मारहाण करुन जखमी केल्याचा धक्कादायक घटना खेड तालुक्यातील आळंदी गावच्या हद्दीतील आवारे हॉस्पिटलच्या समोरील रोडवरून समोर आली आहे.
प्रशांत सदाशिव इनामदार (वय-४० रा. आळंदी, ता. खेड) यांनी आळंदी पोलीस ठाण्यात फिर्याद दिली आहे. याप्रकरणी माऊली वामनराव पपुले (रा. केळगाव ता. खेड) याच्यावर गुन्हा दाखल करण्यात आला आहे.
मिळालेल्या माहितीनुसार, फिर्यादी इनामदार हे आळंदी येथील आवारे हॉस्पिटलच्या समोरील सार्वजनिक रोडवरुन पायी चालत जात होते. त्यावेळी आरोपी लोखंडी पाईप घेऊन त्या ठिकाणी आला. त्याने इनामदार यांना अडवून ‘तू माझ्या बायको बरोबर बोलत आहे काय’ असा जाब विचारला. त्यावर इनामदार यांनी, ‘मी तुला ओळखत नाही.
मी कशाला तुमच्या बायकोबरोबर बोलू’ असे म्हणून पुढे चालू लागले. त्यानंतर आरोपीने फिर्यादी यांना लोखंडी पाईपने पाठिमागून दोन्ही पायावर, हातावर बेदम मारहाण केली. यामध्ये फिर्यादी यांचा डावा पाय फ्रॅक्चर झाला आहे.
दरम्यान, आळंदी पोलीस ठाण्यात माऊली याच्यावर गुन्हा दाखल करण्यात आला असून पुढील तपास पोलीस उपनिरीक्षक खडके करीत आहेत.
