नाशिक हादरले! आधी पत्नीला संपवलं, नंतर सेवानिवृत्त मुख्याध्यापक पतीनं उचललं टोकाचं पाऊल, धक्कादायक कारण आले समोर..
नाशिक : निवृत्त मुख्याध्यापकाने आजारी पत्नीचा गळा दाबून खून केल्यानंतर स्वतः गळफास घेत आत्महत्या केल्याची धक्कादायक घटना उघडकीस आली आहे.विशेष म्हणजे या दाम्पत्याची दोन्ही मुले मुंबई येथे उच्च पदस्थ अधिकारी म्हणून कार्यरत आहेत. ही घटना नाशिक येथील जेलरोड येथून समोर आली आहे.
याबाबत अधिक माहिती अशी की, जेलरोड सावरकर नगर, एकदंत अपार्टमेंटमध्ये पहिल्या मजल्यावरील निवृत्त मुख्याध्यापक मुरलीधर रामचंद्र जोशी (७८) हे आपल्या निवृत्त शिक्षिका असलेल्या लता जोशी यांच्यासोबत वास्तव्यास होते. त्यांची दोन मुले मुंबई येथे उच्चपदस्थ अधिकारी म्हणून काम करीत आहेत.
निवृत्त मुख्याध्यापक मुरलीधर जोशी यांच्या पत्नी लता यांना २०१७ सालापासून मेंदू विकाराचा त्रास होता. काही दिवस लता जोशी या व्हेंटिलेटरवर देखील होत्या. त्यातून त्या सावरल्यानंतर त्यांच्या आजारपणाला दोघे वृद्ध दाम्पत्य कंटाळले होते. बुधवारी संध्याकाळी सहाच्या सुमारास निवृत्त मुख्याध्यापक जोशी यांनी पत्नी लताचा गळा दाबून खून केल्यानंतर स्वतः गळफास घेऊन आत्महत्या केली.
हे करण्यापूर्वी जोशी यांनी चिठ्ठी लिहून मला तीचे हाल बघवत नाही, माझं पत्नीवर खूप प्रेम आहे. तिला मी मुक्त करत आहे. आमच्या मरणास कोणासही कारणीभूत ठरवू नये, असे लिहिले असल्याची माहिती पोलिसांनी दिली आहे. घटनेची माहिती या दाम्पत्याची कामे करणाऱ्या मोलकरणीला समजल्यानंतर तिने आरडा ओरड केली.
दरम्यान, नागरिकांनी पोलिसांना घटनेबाबत कळविल्यानंतर उपनगर पोलीस ठाण्याचे वरिष्ठ पोलीस निरीक्षक जितेंद्र सपकाळे, पोलीस निरीक्षक संजीव फुलपगारे, गुन्हे शोध पथकाचे पोलीस उपनिरीक्षक प्रभाकर सोनवणे व पथक घटनास्थळी धाव घेतली. नाशिकच्या उपनगर पोलीस ठाण्यात रात्री उशिरापर्यंत गुन्हा नोंदविण्याचे काम सुरु होते. या प्रकरणी पोलीस पुढील तपास करत आहेत.
