मिसाईल हल्ला समजून धस्स! मोबाईल अलर्टने नागरिकांची घाबरगुंडी
भारतामध्ये आज अचानक अनेकांच्या मोबाईलवर जोरात सायरन वाजत इमरजन्सी अलर्ट आला आणि क्षणात सगळ्यांचीच घाबरगुंडी उडाली. फोन असा कर्कश आवाजात वाजला की काय आपत्ती आली की काय, असा प्रश्न लोकांच्या मनात निर्माण झाला. काहींना तर थेट “मिसाईल हल्ला झाला की काय?” असंच वाटलं!
अनेकांनी लगेच घरच्यांना फोन लावले, काहींनी सोशल मीडियावर धाव घेत “नेमकं चाललंय काय?” याची चौकशी सुरू केली. काही ठिकाणी लोक घराबाहेर येऊन चर्चा करतानाही दिसले. काही क्षणांसाठी वातावरण पूर्णपणे तणावपूर्ण झालं होतं.
मात्र थोड्याच वेळात चित्र स्पष्ट झालं आणि हा कोणताही धोका नसून सरकारकडून ‘सेल ब्रॉडकास्ट अलर्ट सिस्टम’ची चाचणी असल्याचं समोर आलं. भविष्यात भूकंप, पूर, चक्रीवादळ यांसारख्या आपत्तीच्या वेळी नागरिकांना वेळेवर इशारा देण्यासाठी ही यंत्रणा तयार करण्यात आली आहे.
दरम्यान, भीतीचा हा क्षण काही वेळातच हसण्यात बदलला. सोशल मीडियावर भन्नाट मीम्स व्हायरल झाले. “फोन असा ओरडला की वाटलं आयुष्य संपलं!” किंवा “आज अलार्म लावला नव्हता, सरकारनेच उठवलं!” अशा कमेंट्सनी नेटिझन्सची मजा वाढवली.
क्षणभर जीव टांगणीला लावणारा हा अलर्ट आता चर्चेचा विषय ठरला असून नागरिकांनीही हा अनुभव हलक्याफुलक्या अंदाजात घेतला आहे.
