‘लेडी सुपरकॉप’ मीरा बोरवणकर यांच्याकडे राज्य महिला आयोगाची धुरा

पुणे : राज्य महिला आयोगाच्या अध्यक्षपदी निवृत्त आयपीएस अधिकारी मीरा बोरवणकर यांची नियुक्ती करण्यात आली आहे. रूपाली चाकणकर यांनी पदाचा राजीनामा दिल्यानंतर रिक्त झालेल्या या महत्त्वाच्या पदासाठी सरकारकडून त्यांची निवड करण्यात आली असून या निर्णयाचे सर्वत्र स्वागत होत आहे.

पोलीस सेवेत दीर्घ आणि प्रभावी कारकीर्द असलेल्या बोरवणकर यांची ओळख एक कर्तव्यदक्ष आणि कठोर निर्णय घेणाऱ्या अधिकाऱ्यांपैकी एक अशी आहे. गुन्हेगारी तपासात त्यांनी अनेक महत्त्वाच्या प्रकरणांमध्ये निर्णायक भूमिका बजावली असून कायदा व सुव्यवस्थेच्या अंमलबजावणीत त्यांचा मोठा वाटा राहिला आहे.

महाराष्ट्र केडरमधील पहिल्या महिला आयपीएस अधिकाऱ्यांपैकी एक म्हणून त्यांनी 1981 च्या बॅचमधून सेवेत प्रवेश केला होता. आपल्या कारकिर्दीत त्यांनी अनेक महत्त्वाच्या जबाबदाऱ्या सांभाळत प्रशासनात ठसा उमटवला आहे.

आता राज्य महिला आयोगाच्या माध्यमातून महिलांचे प्रश्न, अत्याचार प्रकरणे आणि त्यांच्या सक्षमीकरणासाठी काम करण्याची मोठी जबाबदारी त्यांच्या खांद्यावर आली आहे. त्यांच्या अनुभवामुळे आयोगाच्या कामकाजाला नवी दिशा मिळेल, अशी अपेक्षा व्यक्त केली जात आहे.