कसा आहे अजय देवगण, तब्बूचा ‘दृश्यम ३’? पहिल्याच दिवशी ट्विटरवर नेटकऱ्यांनी दिला चित्रपटाचा रिव्ह्यू; म्हणाले…
मुंबई : अजय देवगणचा बहुप्रतीक्षित ‘दृश्यम ३ : द कन्क्लुजन’ आज, २ ऑक्टोबर रोजी चित्रपटगृहांमध्ये प्रदर्शित झाला आहे. अभिषेक पाठक दिग्दर्शित हा चित्रपट ‘दृश्यम’ फ्रँचायझीचा तिसरा भाग आहे. चित्रपट प्रदर्शित होताच पहिल्या दिवसाच्या पहिल्या शोसाठी प्रेक्षकांनी थिएटरमध्ये गर्दी केली. दरम्यान, चित्रपट पाहिल्यानंतर अनेक प्रेक्षकांनी सोशल मीडियावर आपल्या प्रतिक्रिया व्यक्त केल्या आहेत.
‘दृश्यम ३’ला सोशल मीडियावर कसा प्रतिसाद?
‘दृश्यम ३’ प्रदर्शित झाल्यानंतर सोशल मीडियावर चित्रपटाच्या रिव्ह्यूची चर्चा सुरू झाली आहे. अनेक प्रेक्षकांनी चित्रपटातील सस्पेन्स, थरार, अनपेक्षित ट्विस्ट आणि कलाकारांच्या अभिनयाचं कौतुक केलं आहे. विजय साळगावकरच्या भूमिकेत अजय देवगण पुन्हा एकदा प्रेक्षकांसमोर आला आहे. आपल्या कुटुंबाला वाचवण्यासाठी त्याची सुरू असलेली धडपड चित्रपटात पाहायला मिळते.
एका प्रेक्षकाने कोणताही स्पॉयलर न देता चित्रपटाबद्दल प्रतिक्रिया दिली आहे. चित्रपटात घडणाऱ्या घटनांमधील सस्पेन्स कायम असल्याचं सांगत, प्रेक्षकांनी स्वतः चित्रपट पाहून त्याचा अनुभव घ्यावा, असं त्याने म्हटलं आहे.
अजय देवगण आणि जयदीप अहलावतच्या अभिनयाचं कौतुक
सोशल मीडियावरील एका रिव्ह्यूमध्ये ‘दृश्यम ३’ला ५ पैकी ३.२५ स्टार देण्यात आले आहेत. या रिव्ह्यूमध्ये जयदीप अहलावतच्या अभिनयाचं विशेष कौतुक करण्यात आलं आहे. तर अजय देवगणने विजय साळगावकरच्या शांत आणि संयमी स्वभावाला पुन्हा एकदा योग्य न्याय दिल्याचं मत व्यक्त करण्यात आलं आहे.
दुसरीकडे, एका प्रेक्षकाने चित्रपटाला ५ पैकी ४ स्टार दिले आहेत. चित्रपटातील थरार आणि ट्विस्टमुळे उत्सुकता कायम राहत असल्याचं त्याने म्हटलं आहे. अजय देवगणच्या अभिनयासोबतच जयदीप अहलावतच्या भूमिकेचाही विशेष उल्लेख करण्यात आला आहे.
चित्रपटाच्या क्लायमॅक्सची सर्वाधिक चर्चा
‘दृश्यम ३’च्या शेवटच्या ३० मिनिटांबाबत सोशल मीडियावर वेगवेगळ्या प्रतिक्रिया उमटत आहेत. काही प्रेक्षकांनी चित्रपटाचा क्लायमॅक्स रंजक असल्याचं म्हटलं आहे. मात्र, विजय साळगावकरच्या व्यक्तिरेखेतील भावनिक बाजू अपेक्षेइतकी प्रभावी वाटली नसल्याचं मतही काही प्रेक्षकांनी व्यक्त केलं आहे.
हिंदी आणि मल्याळम ‘दृश्यम’च्या क्लायमॅक्सची तुलना करणाऱ्या प्रतिक्रियाही समोर आल्या आहेत. एका प्रेक्षकाच्या मते, हिंदी आवृत्तीचा शेवट अधिक व्यावसायिक पद्धतीने सादर करण्यात आला आहे. तर मल्याळम आवृत्तीत विजयची बुद्धिमत्ता आणि त्याची रणनीती अधिक ठळकपणे दाखवण्यात आली होती.
श्रेया सरन आणि प्रकाश राज यांच्या भूमिकांचीही चर्चा
चित्रपटातील श्रेया सरन आणि प्रकाश राज यांच्या भूमिकांबाबतही प्रेक्षकांनी प्रतिक्रिया दिल्या आहेत. एका रिव्ह्यूमध्ये श्रेया सरनला तुलनेने कमी स्क्रीन टाइम मिळाल्याचं नमूद करण्यात आलं आहे. मात्र, तिच्या व्यक्तिरेखेतील एका महत्त्वाच्या प्रसंगाचाही उल्लेख करण्यात आला आहे. प्रकाश राज यांची भूमिका प्रभावी असल्याचं मतही काही प्रेक्षकांनी व्यक्त केलं आहे.
हिंदी ‘दृश्यम’ फ्रँचायझीची सुरुवात २०१५ मध्ये झाली होती. त्यानंतर २०२२ मध्ये ‘दृश्यम २’ प्रदर्शित झाला. आता ‘दृश्यम ३ : द कन्क्लुजन’मधून विजय साळगावकरच्या कथेचा पुढील भाग प्रेक्षकांसमोर आला आहे. चित्रपटाबाबत सोशल मीडियावर संमिश्र प्रतिक्रिया पाहायला मिळत असून, सस्पेन्स, क्लायमॅक्स आणि कलाकारांच्या अभिनयावर प्रेक्षकांमध्ये चर्चा सुरू आहे.
