भयानक! फटाका कारखान्यात भीषण स्फोट, १७ जण जिवंत जळाले, अनेकजण ढिगाऱ्याखाली अडकले, घटनेनंतर मालक फरार
गांधीनगर : गुजरातच्या बनासकांठामध्ये एक धक्कादायक घटना समोर आली आहे. याठिकाणी एका फटाक्याच्या कारखान्यात झालेल्या भीषण स्फोटात १७ जणांचा मृत्यू झाला आहे. यामुळे एकच खळबळ उडाली आहे. कारखान्यात असलेल्या बॉयलरचा स्फोट झाला. त्यामुळे ही दुर्घटना घडली. घटनेतील मृतांचा आकडा वाढण्याची भीती वर्तवली जात आहे.
स्फोट झाला तेव्हा कारखान्यात ३० कामगार काम करत होते. घटनास्थळी अग्निशमन दलाचे जवान पोहोचले असून आग विझवण्याचं काम सुरु आहे. या दुर्घटनेचा एक व्हिडीओ समोर आला आहे. त्यात कारखान्यातील भिंतींचं स्फोटांमुळे मोठं नुकसान झाल्याचं दिसत आहे. टिनची शेड कोसळली आहे. आग मोठी असल्यानं धुराचे लोट निघत आहेत.
स्फोटाचा आवाज बराच दूरपर्यंत ऐकायला गेला. स्फोटामुळे संपूर्ण परिसर हादरला. बनासकांठातील डीसा भागात असलेल्या फटाका कारखान्यात नऊच्या सुमारास स्फोट झाला. याचा आवाज ऐकताच आसपासचे लोक कारखान्याजवळ आले. तेव्हा कारखान्यातून आगीच्या ज्वाळा बाहेर पडत होत्या. याची माहिती लगेच अग्निशमन दलाला दिली गेली.
या स्फोटामुळे कारखान्याच्या एका भागाचं मोठं नुकसान झालं. भिंती, छप्पर कोसळलं असून ढिगाऱ्याखाली काही कामगार अडकले आहेत. जखमींना रुग्णालयात उपचारांसाठी दाखल करण्यात आलं आहे. ही घटना नेमकं का घडली याबाबत सध्या पोलीस तपास करत आहेत.स्फोटानंतर कारखान्याचा मालक फरार झाला आहे. जिल्हाधिकारी माहिर पटेल घटनास्थळी पोहोचले आहेत.
ही घटना दीपक ट्रेडर्स नावाच्या कारखान्यात घडली. या ठिकाणी फटाके तयार केले जातात. या कारखान्याला फटाके तयार करण्याचा परवाना मिळाला होता की नाही, याची चौकशी केली जात आहे. डीसा नगरपालिकेच्या सुचनेवरुन अग्निशमन दलाचे कर्मचारी घटनास्थळी पोहोचले असून आग विझवण्याचे प्रयत्न सुरु आहेत.
