मराठ्यांचा मुंबई मोर्चा ठरला? जरांगे पाटलांची मोठी घोषणा; सरकारला दिले 15 दिवस
जालना : मराठा आरक्षणाच्या मागणीवरून मनोज जरांगे पाटील यांनी पुन्हा एकदा सरकारविरोधात आंदोलनाची भूमिका घेतली आहे. आंतरवाली सराटी येथे त्यांनी आजपासून उपोषण सुरू केलं असून, सरकारला मागण्या सोडवण्यासाठी 15 दिवसांची मुदत दिली आहे.
जरांगे यांनी स्पष्ट केलं की, या मुदतीत सरकारने ठोस निर्णय घेतला नाही तर 12 सप्टेंबर रोजी महाराष्ट्रभरातील मराठा बांधवांना आंतरवाली सराटीत बोलावण्यात येईल. त्याच दिवशी मुंबईतील पुढील आंदोलनाची तारीख जाहीर केली जाणार आहे. त्यामुळे मुंबईकडे जाणाऱ्या आंदोलनाची दिशा आता 12 सप्टेंबरच्या घोषणेनंतर स्पष्ट होणार आहे.
दरम्यान, जरांगे यांनी सरकारला थेट इशारा देताना मुंबईत आंदोलन झाल्यानंतर मराठा समाजाला परत आणणं सोपं राहणार नाही, अशी भूमिका मांडली. मात्र, आंदोलन करताना मुंबईकरांना त्रास होऊ नये आणि समाजाची बदनामी होणार नाही, याची काळजी घेण्याचं आवाहन त्यांनी आंदोलकांना केलं आहे.
मराठा समाजाच्या मागण्यांमध्ये कुणबी नोंदी, सगेसोयरे आणि टिकणारं आरक्षण यांसारख्या मुद्द्यांचा समावेश आहे. आरक्षणाचा प्रश्न कायमस्वरूपी सुटावा आणि समाजाला कायदेशीरदृष्ट्या टिकणारं आरक्षण मिळावं, अशी जरांगे यांची भूमिका आहे.
विशेष म्हणजे, मुंबईतील संभाव्य आंदोलनाच्या पार्श्वभूमीवर राज्याच्या गृह विभागाने यापूर्वीच काही निर्बंध जाहीर केले आहेत. आझाद मैदान वगळता मुंबईतील इतर ठिकाणी आंदोलन, धरणे किंवा सभा घेण्यास बंदी घालण्यात आली आहे. आझाद मैदानातही आंदोलनासाठी वेळ, गर्दी आणि इतर अटी निश्चित करण्यात आल्या आहेत.
त्यामुळे आता जरांगे यांच्या आंदोलनाची पुढील दिशा महत्त्वाची ठरणार आहे. सरकारकडे 15 दिवस, त्यानंतर 12 सप्टेंबरला मराठा समाजाची मोठी बैठक आणि त्याच दिवशी मुंबई आंदोलनाची तारीख जाहीर करण्याचा निर्धार अशी सध्याची रणनीती दिसत आहे. त्यामुळे पुढील काही दिवसांत सरकार आणि जरांगे यांच्यातील संघर्ष आणखी तीव्र होतो का, याकडे संपूर्ण महाराष्ट्राचं लक्ष लागलं आहे.
