मुंबई मनपा कर्मचाऱ्यांसाठी आनंदाची बातमी! दिवाळी अनुदानावर शिक्कामोर्तब, किती रुपये मिळणार?

मुंबई : दिवाळीच्या सणानिमित्त मुंबई महानगरपालिकेतील अधिकारी आणि कर्मचाऱ्यांसाठी आनंदाची बातमी समोर आली आहे. बृहन्मुंबई महानगरपालिकेच्या अधिकारी आणि कर्मचाऱ्यांना यंदा 33 हजार रुपयांचे सानुग्रह अनुदान देण्याचा निर्णय घेण्यात आला आहे. मुंबईच्या महापौर रितू तावडे यांनी याबाबत घोषणा केली आहे. त्यामुळे महापालिकेतील कर्मचारी वर्गात आनंदाचे वातावरण आहे.

नोव्हेंबरच्या पगारासोबत मिळणार अनुदान

दिवाळी सानुग्रह अनुदानाबाबत चर्चा करण्यासाठी महापौरांच्या दालनात उच्चस्तरीय बैठक आयोजित करण्यात आली होती. या बैठकीत सर्वपक्षीय नेते, महापालिका प्रशासन आणि कामगार संघटनांच्या प्रतिनिधींनी चर्चा केली. त्यानंतर कर्मचाऱ्यांना 33 हजार रुपयांचे सानुग्रह अनुदान देण्यावर सर्वानुमते निर्णय घेण्यात आला.

या निर्णयानुसार, कर्मचाऱ्यांना नोव्हेंबर महिन्याच्या नियमित वेतनासोबतच अनुदानाची रक्कम देण्याचे निर्देश देण्यात आले आहेत. त्यामुळे दिवाळीच्या खरेदीसह सणाचा खर्च भागवण्यासाठी कर्मचाऱ्यांना आर्थिक मदत मिळणार आहे.

बैठकीला अनेक मान्यवरांची उपस्थिती

या बैठकीला उपमहापौर संजय घाडी, विरोधी पक्षनेत्या किशोरी पेडणेकर, सभागृहनेते गणेश खणकर, स्थायी समिती अध्यक्ष प्रभाकर शिंदे, शिक्षण समिती अध्यक्ष राजेश्री शिरवडकर यांच्यासह महापालिका प्रशासनातील वरिष्ठ अधिकारी आणि विविध कामगार संघटनांचे पदाधिकारी उपस्थित होते.

सर्व संबंधितांशी चर्चा करून हा निर्णय घेण्यात आल्याचे सांगण्यात आले.

महापालिका कर्मचाऱ्यांसाठी आनंदाची बातमी

मुंबई महानगरपालिकेचे अधिकारी आणि कर्मचारी शहरातील स्वच्छता, आरोग्य, पाणीपुरवठा तसेच विविध नागरी सुविधा सुरळीत ठेवण्यासाठी काम करतात. त्यांच्या योगदानाची दखल घेत दिवाळी सण कुटुंबीयांसोबत आनंदात साजरा करता यावा, या उद्देशाने सानुग्रह अनुदान देण्याचा निर्णय घेण्यात आला आहे.

33 हजार रुपयांच्या अनुदानाच्या घोषणेमुळे महापालिका कर्मचाऱ्यांना दिलासा मिळाला असून, यंदाची दिवाळी अधिक आनंदात साजरी करण्याची संधी मिळणार आहे.