‘सोन्याचा भाव कोसळला!’ 4 दिवसांत तब्बल ₹4,500 घसरण; खरेदीदारांसाठी मोठी संधी की पुढे आणखी स्वस्त होणार?
पुणे : सोन्याच्या वाढत्या दरामुळे खरेदी लांबणीवर टाकणाऱ्या ग्राहकांसाठी मोठा दिलासा देणारी बातमी समोर आली आहे. काही दिवसांपूर्वी विक्रमी उंचीवर पोहोचलेले सोन्याचे दर आता घसरू लागले असून अवघ्या चार दिवसांत प्रति तोळा तब्बल 4,500 रुपयांची घसरण नोंदवली गेली आहे. त्यामुळे सराफा बाजारात एकच खळबळ उडाली असून “आता खरेदी करावी की आणखी वाट पाहावी?” असा प्रश्न ग्राहकांना पडला आहे.
जळगाव सराफा बाजारातील माहितीनुसार, गेल्या 24 तासांतच सोन्याच्या दरात सुमारे अडीच हजार रुपयांची घट झाली आहे. या घसरणीनंतर जीएसटीसह 24 कॅरेट सोन्याचा दर प्रति तोळा सुमारे 1 लाख 56 हजार रुपयांपर्यंत खाली आला आहे. विशेष म्हणजे सलग चार दिवसांपासून सुरू असलेल्या घसरणीमुळे बाजारातील वातावरण पूर्णपणे बदलले आहे.
सोन्यासोबतच चांदीलाही मोठा फटका बसला आहे. केवळ एका दिवसात चांदीच्या दरात तब्बल 12 हजार रुपयांची घसरण झाली असून प्रतिकिलो चांदीचा दर सुमारे 2 लाख 56 हजार रुपयांपर्यंत खाली आला आहे. त्यामुळे गुंतवणूकदार आणि व्यापारी दोघेही बाजारातील पुढील हालचालींवर बारीक नजर ठेवून आहेत.
आंतरराष्ट्रीय स्तरावर सुरू असलेल्या युद्धसदृश परिस्थिती, जागतिक अर्थव्यवस्थेतील बदल आणि गुंतवणूकदारांच्या भूमिकेमुळे सोन्या-चांदीच्या दरात मोठी अस्थिरता निर्माण झाली आहे. काही महत्त्वाच्या देशांदरम्यान सुरू असलेल्या शांतता चर्चांमुळे सुरक्षित गुंतवणूक म्हणून सोन्यावरील दबाव कमी झाल्याचे मानले जात आहे. याचाच परिणाम दरातील घसरणीत दिसून येत असल्याचे बाजारातील जाणकार सांगतात.
मात्र ही घसरण कायम राहील की पुन्हा सोन्याचे दर विक्रमी उंची गाठतील, याबाबत अद्याप निश्चित चित्र स्पष्ट झालेले नाही. जागतिक घडामोडींमध्ये अचानक बदल झाल्यास सोन्याचे दर पुन्हा वाढू शकतात, असा इशाराही सराफा व्यावसायिक देत आहेत.
दरम्यान, लग्नसराईचा हंगाम, आगामी सण आणि गुंतवणुकीचा विचार करणाऱ्यांसाठी सध्याची परिस्थिती फायदेशीर ठरू शकते. त्यामुळे सोन्याच्या बाजारात सध्या ‘खरेदीची सुवर्णसंधी’ असल्याची चर्चा रंगू लागली असून पुढील काही दिवस दर कोणती दिशा घेतात याकडे सर्वांचे लक्ष लागले आहे.
