आई कामावर, घरात घडला रक्तरंजित खेळ! 3 वर्षीय चिमुकल्याचा ‘लिव्ह-इन’ पार्टनरने घेतला जीव…
पुणे : पुणे जिल्ह्यातील शिरूर तालुक्यातील रांजणगाव औद्योगिक परिसरात घडलेल्या एका धक्कादायक घटनेने संपूर्ण राज्य हादरले आहे. आई कामासाठी बाहेर गेल्यानंतर घरात एकट्या असलेल्या तीन वर्षांच्या चिमुकल्याचा संशयास्पद मृत्यू झाला असून, या प्रकरणात आईसोबत लिव्ह-इन रिलेशनशिपमध्ये राहणाऱ्या 20 वर्षीय तरुणावर गंभीर आरोप करण्यात आले आहेत.
पोलिसांकडून मिळालेल्या माहितीनुसार, संबंधित महिला आपल्या मुलासह आणि लिव्ह-इन पार्टनरसह रांजणगाव परिसरात राहत होती. काही दिवसांपासून आरोपी आणि महिलेमध्ये मुलाच्या संगोपनावरून वाद सुरू होते. मुलाला त्याच्या वडिलांकडे सोडून द्यावे, अशी मागणी आरोपी वारंवार करत असल्याची माहिती तपासात समोर आली आहे.
गुरुवारी सकाळी महिला नेहमीप्रमाणे कामावर गेल्यानंतर घरात आरोपी आणि चिमुकला दोघेच होते. याच काळात मुलासोबत काहीतरी अघटित घडले. घटनेची माहिती समोर येताच परिसरात खळबळ उडाली. पोलिसांनी तत्काळ घटनास्थळी धाव घेत तपास सुरू केला. प्राथमिक चौकशीनंतर देवांशी साहू (वय 20) या तरुणाला ताब्यात घेण्यात आले आहे.
या घटनेमुळे परिसरातील नागरिकांमध्ये संतापाचे वातावरण असून, आरोपीवर कठोर कारवाई करण्याची मागणी होत आहे. मुलाच्या मृत्यूमागील नेमके कारण आणि हत्येची पद्धत याबाबत पोलिस अधिकृतरीत्या माहिती गोळा करत असून शवविच्छेदन अहवालाची प्रतीक्षा आहे.
दरम्यान, राज्यात यापूर्वीही अशाच स्वरूपाच्या काही घटना समोर आल्या आहेत. एप्रिल महिन्यात पुणे जिल्ह्यातील खेड तालुक्यात एका महिलेने आपल्या सहा वर्षीय मुलाची हत्या केल्याचे उघड झाले होते. त्याचप्रमाणे रायगडमध्येही लिव्ह-इन नातेसंबंधातून निर्माण झालेल्या वादातून दोन लहान मुलांची हत्या झाल्याची घटना घडली होती.
रांजणगावातील या ताज्या घटनेमुळे पुन्हा एकदा लहान मुलांच्या सुरक्षिततेचा मुद्दा चर्चेत आला आहे. पोलिसांकडून सर्व बाजूंनी तपास सुरू असून, आरोपीविरोधात गंभीर गुन्हा दाखल करण्याची प्रक्रिया सुरू आहे. या घटनेने संपूर्ण परिसरात शोककळा पसरली असून, नागरिकांकडून तीव्र संताप व्यक्त केला जात आहे.
