अभिनेता सोनू सूद विरोधात कोर्टाने जारी केलं अटक वॉरंट! अडचणी वाढल्या, काय आहे नेमकं प्रकरण?
मुंबई : बॉलिवूड अभिनेता सोनू सूद कायदेशीर कचाट्यात सापडला आहे. एका फसवणुकीच्या प्रकरणात कोर्टानं सोनू सूद विरोधात अटकेचं वॉरंट जारी केलं आहे. पंजाबमधील लुधियाना कोर्टानं हा अटक वॉरंट जारी केला आहे.
कोर्टात साक्ष देण्यासाठी सोनू सूदला वारंवार बोलावण्यात आले होते. अनेक नोटिसा पाठवूनही सोनूने त्याला प्रतिसाद दिला नाही. त्यामुळेच त्याच्या अटकेचं वॉरंट जारी करण्यात आलं आहे. त्यामुळे एकच खळबळ उडाली आहे. त्यावर आता सोनू सूद काय प्रतिक्रिया देणार याकडे सर्वांचं लक्ष लागलं आहे.
नेमकं प्रकरण काय?
लुधियाना येथील वकील राजेश खन्ना यांनी मोहित शुक्ला नावाच्या एका व्यक्तीविरोधात दहा लाख रुपयांच्या कथित फसवणुकीचा खटला दाखल केला आहे. ज्यामध्ये त्यांनी दावा केला आहे की, त्यांना बनावट रिजिका कॉइनमध्ये गुंतवणूक करण्याचे आमिष दाखवण्यात आले होते.
यात पैसे गुंतवले तर चांगला आर्थिक फायदा होईल, असे आमिष आरोपींकडून देण्यात आलं होतं. ज्या कॉइनमध्ये गुंतवणूक करण्याचं आमिष दाखवलं होतं, त्या कॉईनचे ब्रँड ॲम्बेसेडर सोनू सूद असल्याचा आरोप आहे. आता या प्रकरणाशी थेट सोनू सूदचा संबंध नाहीये.
पण या फसवणूक प्रकरणात साक्ष देण्यासाठी कोर्टाकडून सातत्याने सोनू सूदला बोलवण्यात येत होतं. मात्र सोनू कोर्टात हजर झाला नाही. यामुळेच त्याच्याविरोधात अटक वॉरंट जारी करण्यात आले. लुधियाना न्यायालयाने आपल्या आदेशात, मुंबईतील अंधेरी पश्चिम येथील ओशिवरा पोलीस स्टेशनचे प्रभारी अधिकारी यांना सोनू सूदला अटक करण्याचे निर्देश दिले.
