पुण्यातील महायुतीमधील संघर्ष पेटला ; शिंदेंचा नगराध्यक्ष पदाचा उमेदवारच अजित पवारांनी पळवला…
पुणे : आगामी स्थानिक स्वराज्य संस्थांच्या निवडणुकांच्या पार्श्वभूमीवर राज्याच्या राजकीय पटलावर मोठी उलथापालथ घडली आहे.पुणे जिल्ह्यातही महायुतीमधील नेत्यांनी निवडणुकीच्या तोंडावरच फोडाफोडी केली आहे. याआधी भाजप आणि शिवसेना यावरून भिडत होते. मात्र आता यामध्ये राष्ट्रवादीनेही उडी घेतली आहे.आता अजित पवारांनी एकनाथ शिंदे यांचा थेट नागराध्यक्ष पदाचा उमेदवारच फोडल्याने नव्या वादाला तोंड फुटले आहे.
पुणे जिल्ह्यातील भोरमध्ये यंदाची लढत विशेष गाजत आहे. पूर्वी येथे भाजपची ताकद ही मर्यादित होती. मात्र माजी आमदार संग्राम थोपटे भाजपमध्ये प्रवेश केल्यानंतर या तालुक्यात भाजपचे वजन मोठ्या प्रमाणात वाढले आहे. दुसरीकडे, राष्ट्रवादी काँग्रेसने अनेक वर्षे संग्राम थोपटे यांना स्थानिक पातळीवर थेट आव्हान देत आपली ताकद टिकवून ठेवली आहे. यामुळे भोर नगरपालिकेच्या निवडणुकीत थोपटे यांच्या भाजप आणि अजित पवार यांच्या राष्ट्रवादी काँग्रेसमध्ये थेट आमने-सामने लढत आहे. त्यातच उपमुख्यमंत्री एकनाथ शिंदे यांच्या शिवसेनेनेही अनेक ठिकाणी आक्रमक पवित्रा घेत भोरच्या मैदानात उतरले आहेत. मात्र, निवडणुकीच्या तोंडावर शिंदे गटाला मोठा धक्का बसला आहे.भोर नगराध्यक्षपदासाठी शिवसेनेकडून अर्ज दाखल करणारे नितीन सोनवले यांनी अचानक राष्ट्रवादी काँग्रेसमध्ये प्रवेश केला. राष्ट्रवादीचे आमदार शंकर मांडेकर यांच्या उपस्थितीत हा प्रवेश सोहळा पार पडला. सोनवले आता शिवसेनेकडून भरलेला उमेदवारी अर्ज मागे घेणार असून आगामी निवडणुकीत राष्ट्रवादीसाठी सक्रिय भूमिका बजावणार आहेत. त्यामुळे शिवसेनेचा प्रमुख उमेदवारच हातातून गेल्याने पक्षाची भोरमधील पक्षाची राजकीय ताकद कमी झाली आहे.
दरम्यान ऐन निवडणुकीच्या तोंडावर संग्राम थोपटे यांच्या प्रभावामुळे भाजपचे वर्चस्व वाढलेले असताना, त्यांना रोखण्यासाठी राष्ट्रवादीने हा डाव आखल्याचे स्पष्ट आहे. सोनवले यांच्या माघारीनंतर आगामी निवडणुकीत महायुतीच्या दोन प्रमुख पक्षांमध्ये भाजप आणि राष्ट्रवादी काँग्रेस अशी थेट टक्कर रंगणार आहे. ही थेट लढाई होतं असताना भोर नगरपालिकेच्या लढतीतून महायुतीतील अंतर्गत स्पर्धा दिसून आली आहे.आता भाजप-शिवसेनेच्या फोडाफोडीवरून भिडत असताना यात आता अजित पवारांच्या राष्ट्रवादीने देखील उडी घेतली असून महायुतीतील संघर्ष टोकाला गेला आहे.
