पुण्यात बालविवाह उघडकीस! बालविवाह करून मारहाण करणाऱ्या पतीला पिंपरी पोलिसांनी ठोकल्या बेड्या..
पिंपरी : चार महिन्यांपूर्वी झालेला बालविवाह उघडकीस आला असून पतीला पिंपरी पोलिसांनी अटक केली. तसेच बालविवाह प्रतिबंध कायद्यानुसार १४ जणांविरोधात गुन्हा दाखल करण्यात आला आहे. याप्रकरणी अल्पवयीन विवाहितेने पिंपरी पोलीस ठाण्यात फिर्याद दिली आहे.
त्यानुसार पती रोहित सुरज भोसले (वय २२ रा.पिंपरीगाव) याला अटक केली. तसेच रोहन राजेंद्र कांबळे (वय २२), लालसो कांबळे (वय ७०), तुषार गायकवाड (वय २२), प्रेम उर्फ राहुल सुरज भोसले (वय १७), शिवाजी साळवे (वय ४५) यांच्यासह सात महिला आणि रोहितच्या तीन मावस भाऊ यांच्यावर बालविवाह प्रतिबंधक कायद्यानुसार गुन्हा दाखल करण्यात आला आहे.
मिळालेल्या माहिती नुसार, फिर्यादी या अल्पवयीन आहेत. त्या अल्पयवयीन असताना आरोपींनी संगनमत करुन रोहित याच्याशी त्यांचा चार महिन्यापूर्वी विवाह लावून दिला. रोहितने बळजबरीने शारीरिक संबंध ठेवले. शिवीगाळ करत हाताने मारहाण केली. या विवाहाला फिर्यादीच्या आईचा पूर्वीपासून विरोध होता.
दरम्यान, चार महिन्यानंतर आईने मुलीसह पोलीस ठाण्यात धाव घेतली. पिंपरी ठाण्याचे सहाय्यक पोलीस निरीक्षक डॉ. अशोक डोंगरे तपास करत आहेत.
