School Holiday : विद्यार्थ्यांसाठी मोठी बातमी! आधी दसऱ्याची सुट्टी, मग दिवाळीचा ब्रेक; शाळा कधी उघडणार? पाहा संपूर्ण वेळापत्रक
मुंबई : महाराष्ट्रातील शालेय विद्यार्थ्यांसाठी सुट्ट्यांबाबत महत्त्वाची माहिती समोर आली आहे. दसऱ्याच्या सुट्टीची तारीख जाहीर झाली असून, त्यानंतर दिवाळीच्या सुट्ट्यांचे वेळापत्रकही स्पष्ट करण्यात आले आहे. त्यामुळे विद्यार्थ्यांना सणांच्या सुट्ट्यांचे नियोजन करता येणार आहे. शिक्षण विभागाने जारी केलेल्या परिपत्रकानुसार, मंगळवार, २० ऑक्टोबर २०२६ रोजी राज्यातील सर्व मान्यताप्राप्त प्राथमिक, माध्यमिक आणि उच्च माध्यमिक शाळांना विजयादशमीनिमित्त सुट्टी असणार आहे.
दसरा हा महाराष्ट्रातील महत्त्वाचा सण असल्याने विद्यार्थ्यांना आणि शिक्षकांना सणाचा आनंद घेता यावा, यासाठी ही सुट्टी देण्यात आली आहे. सार्वजनिक सुट्ट्यांचे पालन करणे राज्यातील शाळांसाठी बंधनकारक आहे. त्यामुळे मंगळवारी शाळा बंद राहतील, तर बुधवारी, २१ ऑक्टोबरपासून शाळांचे नियमित कामकाज पुन्हा सुरू होईल.
दिवाळीची सुट्टी नेमकी किती दिवस?
दसऱ्याची सुट्टी संपल्यानंतर विद्यार्थ्यांना दिवाळीच्या सुट्टीची प्रतीक्षा असेल. यंदा दिवाळीची सुट्टी सोमवार, २ नोव्हेंबरपासून सुरू होऊन शनिवार, १४ नोव्हेंबर २०२६ पर्यंत असणार आहे. या कालावधीत विद्यार्थ्यांना सण साजरा करण्यासाठी आणि कुटुंबासोबत वेळ घालवण्यासाठी सुट्टी मिळणार आहे.
दिवाळीची सुट्टी संपल्यानंतर सोमवार, १६ नोव्हेंबर २०२६ पासून शाळांचे दुसरे सत्र सुरू होणार आहे. त्यामुळे विद्यार्थी आणि पालकांनी या तारखा लक्षात घेऊन पुढील नियोजन करणे आवश्यक आहे.
सुट्ट्यांबाबत शाळांना कोणते नियम लागू?
शासनाने जाहीर केलेल्या सार्वजनिक सुट्ट्या आणि विभागीय आयुक्तांनी निश्चित केलेल्या स्थानिक सुट्ट्या संबंधित जिल्ह्यातील सर्व शाळांना लागू करणे बंधनकारक आहे. शाळांना या नियमांनुसारच सुट्ट्यांचे नियोजन करावे लागणार आहे.
शैक्षणिक वर्षातील एकूण सुट्ट्यांचा कालावधी ७६ दिवसांपेक्षा जास्त होणार नाही, याची काळजी घेण्याचे निर्देश देण्यात आले आहेत. तसेच विद्यार्थ्यांचा अभ्यासक्रम वेळेत पूर्ण व्हावा आणि शैक्षणिक नुकसान होऊ नये, यासाठी वर्षभरात किमान २३० कामकाजाचे दिवस पूर्ण करणे अनिवार्य आहे.
त्यामुळे यंदा दसरा आणि दिवाळीच्या सुट्ट्यांनंतर शाळा नेमक्या कधी सुरू होणार, याबाबतचे वेळापत्रक स्पष्ट झाले आहे. विद्यार्थ्यांनी आणि पालकांनी दसऱ्याची २० ऑक्टोबरची सुट्टी, २ ते १४ नोव्हेंबरदरम्यानची दिवाळीची सुट्टी आणि १६ नोव्हेंबरपासून सुरू होणारे दुसरे सत्र या तारखा लक्षात ठेवाव्यात.
