गॅस ग्राहकांसाठी मोठी बातमी! LPG सिलेंडरच्या दरात वाढ, तपासा तुमच्या शहरातील नवा दर..
नवी दिल्ली : महागाईच्या पार्श्वभूमीवर सर्वसामान्यांसाठी आणखी एक चिंतेची बातमी समोर आली आहे. पेट्रोल, डिझेल आणि सीएनजीच्या वाढत्या किमतींनंतर आता व्यावसायिक एलपीजी गॅस सिलेंडरच्या दरात पुन्हा वाढ करण्यात आली आहे. 1 जूनपासून ही दरवाढ लागू झाली असून हॉटेल, रेस्टॉरंट आणि लघुउद्योगांवर त्याचा थेट परिणाम होण्याची शक्यता आहे.
तेल कंपन्यांनी 19 किलो वजनाच्या व्यावसायिक एलपीजी सिलेंडरच्या दरात 42 ते 53 रुपयांपर्यंत वाढ केली आहे. त्यामुळे विविध शहरांमध्ये व्यावसायिक सिलेंडरचे दर वाढले आहेत. तसेच 5 किलोच्या एलपीजी सिलेंडरच्या किमतीतही 11 रुपयांची वाढ करण्यात आल्याची माहिती समोर आली आहे.
या दरवाढीचा सर्वाधिक फटका व्यावसायिक वापरकर्त्यांना बसणार असून हॉटेल्स, रेस्टॉरंट्स आणि खाद्य व्यवसायांचा खर्च वाढण्याची शक्यता आहे. परिणामी, बाहेर जेवण किंवा खाद्यपदार्थांच्या किमतींवरही त्याचा अप्रत्यक्ष परिणाम होऊ शकतो.
गेल्या महिन्यातही व्यावसायिक एलपीजी सिलेंडरच्या दरात वाढ करण्यात आली होती. त्यानंतर आता पुन्हा दरवाढ झाल्याने व्यावसायिक क्षेत्रातील चिंता वाढली आहे. वाढत्या इंधन खर्चामुळे व्यवसायांचे आर्थिक गणित बिघडण्याची शक्यता व्यक्त केली जात आहे.
मात्र, दिलासादायक बाब म्हणजे घरगुती वापराच्या 14.2 किलो एलपीजी सिलेंडरच्या दरात सध्या कोणताही बदल करण्यात आलेला नाही. त्यामुळे लाखो कुटुंबांना तात्पुरता दिलासा मिळाला आहे.
तज्ज्ञांच्या मते, आंतरराष्ट्रीय बाजारातील कच्च्या तेलाच्या किमतीतील चढ-उतार, जागतिक भू-राजकीय परिस्थिती आणि वाढलेला आयात खर्च यामुळे ऊर्जा क्षेत्रावर दबाव निर्माण झाला आहे. त्याचा परिणाम एलपीजीच्या दरांवर होत असल्याचे मानले जात आहे.
