BHMS डॉक्टरांच्या नोंदणीला ‘ब्रेक’! सरकारचा मोठा निर्णय; कोर्टाचा निकाल येईपर्यंत प्रक्रिया थांबवली
मुंबई : महाराष्ट्रातील BHMS डॉक्टरांच्या महाराष्ट्र मेडिकल कौन्सिलमधील (MMC) नोंदणी प्रक्रियेबाबत राज्य सरकारने मोठा निर्णय घेतला आहे. न्यायालयाचा अंतिम निर्णय होईपर्यंत BHMS डॉक्टरांची MMC मध्ये नोंदणी थांबवण्याचे आदेश वैद्यकीय शिक्षण विभागाने दिले आहेत. त्यामुळे गेल्या काही दिवसांपासून सुरू असलेल्या BHMS-CCMP वादाला आता नवे वळण मिळाले आहे.
या निर्णयामागे इंडियन मेडिकल असोसिएशन (IMA) आणि महाराष्ट्र असोसिएशन ऑफ रेसिडेंट डॉक्टर्स (MARD) यांच्या तीव्र विरोधाची पार्श्वभूमी आहे. BHMS डॉक्टरांनी आधुनिक औषधशास्त्रातील प्रमाणपत्र अभ्यासक्रम पूर्ण केल्यानंतर त्यांना MMC मध्ये नोंदणी देण्याच्या निर्णयाला ॲलोपॅथी डॉक्टरांच्या संघटनांनी आक्षेप घेतला होता. त्यांच्या मते, आधुनिक वैद्यकातील नोंदणी आणि उपचारांसाठी आवश्यक प्रशिक्षण व पात्रतेबाबत स्पष्टता असणे गरजेचे आहे.
दरम्यान, या निर्णयाच्या पार्श्वभूमीवर वैद्यकीय क्षेत्रातील संघर्षही तीव्र झाला होता. 5 ऑगस्टपासून MARDने राज्यव्यापी आंदोलन सुरू करत BHMS-CCMP नोंदणीला स्थगिती देण्याची मागणी केली होती. या मुद्द्यावरून सरकारी रुग्णालयांमधील वैद्यकीय सेवांवरही परिणाम झाला होता. मात्र, उच्च न्यायालयाच्या हस्तक्षेपानंतर आंदोलन मागे घेण्यात आले होते.
महाराष्ट्रात BHMS डॉक्टरांना आधुनिक औषधशास्त्राशी संबंधित मर्यादित अधिकार देण्याचा मुद्दा नवीन नाही. 2014 मधील कायद्यातील बदलानंतर पात्र BHMS डॉक्टरांना अतिरिक्त अभ्यासक्रमाच्या आधारे विशिष्ट आधुनिक औषधांचा वापर करण्याचा मार्ग खुला करण्यात आला होता. मात्र, त्यानंतर MMC मधील दुहेरी नोंदणी आणि आधुनिक वैद्यकाच्या अधिकारांवरून कायदेशीर व वैद्यकीय वर्तुळात सातत्याने वाद सुरू आहे.
आता वैद्यकीय शिक्षण विभागाने सध्याचे वातावरण निवळेपर्यंत आणि नोंदणीची योग्य कार्यपद्धती निश्चित होईपर्यंत प्रक्रिया रोखण्याची भूमिका घेतली आहे. विशेष म्हणजे, मुंबई उच्च न्यायालयात या प्रकरणाशी संबंधित सुनावणी सुरू असून अंतिम निर्णय होईपर्यंत BHMS डॉक्टरांची MMC नोंदणी करणे योग्य ठरणार नसल्याचे शासनाने स्पष्ट केले आहे. त्यामुळे या निर्णयाचा थेट परिणाम नोंदणीच्या प्रतीक्षेत असलेल्या BHMS-CCMP डॉक्टरांवर होणार आहे.
आता सर्वांचे लक्ष मुंबई उच्च न्यायालयाच्या अंतिम निर्णयाकडे लागले आहे. न्यायालयाचा निकाल आल्यानंतरच BHMS डॉक्टरांच्या MMC नोंदणीचा मार्ग पुन्हा मोकळा होणार की सध्याची व्यवस्था बदलली जाणार, हे स्पष्ट होईल. दरम्यान, IMA आणि MARDच्या विरोधामुळे हा मुद्दा केवळ डॉक्टरांच्या नोंदणीपुरता मर्यादित न राहता वैद्यकीय पात्रता, उपचारांचे अधिकार आणि रुग्णांच्या सुरक्षिततेशी संबंधित मोठ्या चर्चेचा विषय बनला आहे.
