शिरूर -हवेलीत आ. अशोक पवार यांचा उमेदवारी अर्ज दाखल ! अजित पवार यांच्याकडे उमेदवार नसल्याचे डागले टिकास्त्र …..
शिरुर : शिरूर-हवेली विधानसभा मतदारसंघासाठी महाविकास आघाडीचे राष्ट्रवादी काँग्रेस शरदचंद्र पवार पक्षाचे उमेदवार अशोक रावसाहेब पवार यांनी मोठे शक्तीप्रदर्शन करून खासदार डॉ. अमोल कोल्हे, खासदार निलेश लंके व शिवसेना माजी जिल्हा प्रमूख संजय सातव यांच्या उपस्थितीत आज आपला उमेदवारी अर्ज दाखल केला आहे.
आज सकाळी शिरूर बाजार समिती आवारातील छत्रपती शिवाजी महाराज पुतळ्यास पुष्पहार घालून मोठी रॅली काढून शक्तीप्रदर्शन करत शहरातील भारतरत्न डॉक्टर बाबासाहेब आंबेडकर यांच्या पुतळ्याला पुष्पहार घालून शहरातील प्रमुख रस्त्यावरून मिरवणुकीत काढण्यात आल्यानंतर उमेदवारी अर्ज भरण्यात आला. यावेळी राष्ट्रवादी काँग्रेस पक्ष शरदचंद्र पवार, काँग्रेस आय, शिवसेना उद्धव बाळासाहेब ठाकरे पक्षाचे कार्यकर्ते व मोठ्या प्रमाणात महिलांचा सहभाग होता.
आज सकाळी रासाई देवी वडगाव रासाई, श्री रामलिंग शिरूर, व घरातील कुलदेवताला नतमस्तक करून आमदार अशोक पवार आपला उमेदवारी अर्ज भरण्यासाठी शिरूर येथे आले. शिरूर येथे भव्य रॅलीने शक्तीप्रदर्शनात महिला, तरुण, पुरुष , वृद्ध असे अनेक नागरिक या रॅलीमध्ये सहभागी झाले होते.तसेच यावेळी महाविकास आघाडीचा विजय असो शरद पवार जिंदाबाद, उद्धव बाळासाहेब ठाकरे जिंदाबाद, राहुल गांधी जिंदाबाद अशा घोषणा कार्यकर्त्यांकडून देण्यात आल्या.
आ. अशोक पवार म्हणाले की,पाच वर्षात जनतेच्या आर्शिवादावर निवडणूक लढवित आहे. आपली निष्ठा ही पद व मंत्रीपदासाठी नसून जनतेच्या प्रश्नांना न्याय हाच मुद्दा घेऊन मतदारांपर्यंत जाणार आहे.मला विधानसभेत ‘निवडून कसा येतो ‘ अशी वर्गना करणाऱ्यांना उमेदवार आयात करावा लागला आहे. तर त्यांना उमेदवार घोषित न करण्याची वेळ आली आहे.
जनता मला निवडून देईल असा विश्वास त्यांनी अजित पवार यांचे नाव टाळून केला आहे.
